POLISI Y'U RWANDA

IGP Gasana yashimye uruhare rw’ Urubyiruko rw’abakorerabushake mu kwicungira umutekano

Umuyobozi mukuru wa Polisi y’u Rwanda (IGP) Emmanuel K. Gasana, yashimye Urubyiruko rw’abakoranabushake mu kwicungira umutekano kubera uruhare bagira mu kwicungira umutekano n’imikoranire bafitanye n’inzego z’umutekano.

Ibi IGP Gasana yabivugiye mu nama yagiranye n’abahuzabikorwa b’uru rwego rw’urubyiruko baturutse muri buri karere, bari kumwe na komite nshingwabikorwa yabo ku rwego rw’igihugu, ndetse n’abapolisi bashinzwe imikoranire myiza n’ubufatanye hagati ya Polisi y’u Rwanda, abaturage n’izindi nzego mu kurwanya no gukumira ibyaha mu turere twose tw’igihugu, ikaba yabereye ku cyicaro gikuru cya Polisi y’u Rwanda ku Kacyiru ku itariki ya 22 Kamena 2017.

IGP Gasana yashimye urwo rubyiruko, n’abandi bafatanyabikorwa ba Polisi y’u Rwanda ndetse n’abanyarwanda bose, uruhare bagira mu gukumira no kurwanya ibyaha, n’umurava no kwitanga izi nzego zose zagaragaje mu bikorwa byaranze icyumweru cyahariwe ibikorwa bya Polisi (Police week). Inkuru yose

371 binjijwe muri DASSO nyuma yo gusoza amasomo i Gishali

371 binjijwe mu rwego rwunganira uturere mu kubungabunga umutekano (District Administrative Security Support Organ (DASSO) nyuma yo gusoza amasomo ajyanye n’izo nshingano baherewe mu Ishuri rya Polisi y’u Rwanda (Police Training  School - PTS) riri i Gishari mu karere ka Rwamagana.

Mu bahuguwe harimo igitsinagore 88. Umuhango wo gusoza ayo masomo yamaze amezi atatu wabereye muri iri shuri ku itariki 23 z’uku Kwezi. Iri tsinda ni icyiciro cya gatatu kiyashoje. Bigishijwe na Polisi y’u Rwanda  ifatanyije n’izindi nzego nk’uko byagenze no ku bindi byiciro.

Ayo mahugurwa yasojwe ku mugaragaro n’Umunyamabanga wa Leta muri Minisiteri y’Ubutegetsi bw’Igihugu ushinzwe iterambere ry’abaturage,Vincent Munyeshyaka.

Mu bitabiriye uwo muhango harimo Umuyobozi Mukuru wa Polisi y’u Rwanda, Inspector General of Police (IGP) Emmanuel K. Gasana, Umwungirije ushinzwe ubuyobozi n’abakozi, DIGP Juvenal Marizamunda, bamwe mu bayobozi b’uturere na bamwe mu Bofisiye bakuru ba Polisi y’u Rwanda.

Mu ijambo rye, Umunyamabanga wa Leta muri Minisiteri y’igihugu  ushinzwe iterambere ry’abaturage yashimye Polisi y’u Rwanda ku ruhare rwayo mu guteza imbere  urwego rwa  DASSO binyuze mu guhugura abarugize.

Yabwiye DASSO basoje amahugurwa ati, "Ubumenyi mukuye hano (PTS) muzabukoreshe mufatanya na bagenzi banyu kunganira uturere n’izindi nzego z’umutekano kuwubungabunga." Inkuru yose

Musanze: Hangijwe ibiyobyabwenge bitandukanye abaturage bahabwa ubutumwa bwo kubyirinda

Polisi y’u Rwanda ikorera mu karere ka Musanze ifatanyije n’inzego zitandukanye bangije ibiyobyabwenge binyuranye birimo urumogi, kanyanga, inzoga zitemewe zo mu masashi, amavuta yangiza uruhu n’ibindi. Ibi biyobyabwenge byangirijwe kuri Sitasiyo za Polisi y’u Rwanda zitandukanye zo muri aka karere, ku itariki ya 23 Kamena.

Ibi biyobyabwenge byose byangijwe, bifite agaciro k’amafaranga y’u Rwanda 10,115,800. Uwo muhango wo kubyangiza witabiriwe n’abayobozi b’inzego z’ibanze, iz’umutekano,ubushinjacyaha ku rwego  rwisumbuye muri aka karere ndetse  n’abaturage.

Umuvugizi wa Polisi y’u Rwanda mu Ntara y’Amajyaruguru Inspector of Police (IP) Innocent Gasasira, ubwo yagezaga ubutumwa ku baturage bwo kubyirinda yagize ati:” nta terambere ry’umunywi w’ibiyobyabwenge, kuko adakora kandi ibyakabaye bimuteza imbere abipfusha ubusa, abigura ibimwangiriza ubuzima” Inkuru yose

Polisi ya Rubavu yataye muri yombi umugabo ukekwaho guha ruswa umupolisi

Polisi y’u Rwanda ikorera mu karere ka Rubavu, kuwa gatatu tariki ya 21 Kamena, yataye muri yombi umugabo witwa Ntegeyimana Jean de Dieu w’imyaka 38, ukomoka mu murenge wa Mudende akagari ka Ndorayi umudugudu wa Nyabishongo, akekwaho gushaka guha ruswa umupolisi.

Umuvugizi wa Polisi mu ntara y’Uburengerazuba Chief Inspector of Police (CIP) Theoneste Kanamugire yavuze ko uyu mugabo ariwe nyiri iyi moto, ariko ikaba yaratwarwaga n’undi muntu, uyu wayitwaraga akaba yarahagaritswe na Polisi ikamubaza uruhushya rwo gutwara ibinyabiziga n’urwo gutwara abagenzi akabibura, agahita asiga moto akiruka. Iyi moto rero yahise ijyanwa kuri sitasiyo ya Polisi ya Nyabishongo, ari nabwo uyu Ntegeyimana yaje kureba umuyobozi w’iyi sitasiyo, ndetse ashaka no kumuha amafaranga y’u Rwanda ibihumbi mirongo ine (40,000Frw) ngo akunde amusubize iyi moto.

CIP Kanamugire yavuze ati:”Uyu mugabo ubwo yazaga yashatse guha ruswa uyu mupolisi, nawe ahita amuta muri yombi ubu akaba afungiye kuri sitasiyo ya Polisi ya Kanama mu gihe iperereza rikomeje.” Inkuru yose

Rubavu: Ku bufatanye n’abaturage, Polisi yafashe ibiro 45 by’urumogi byinjizwaga mu Rwanda

Kuri sitasiyo ya Polisi ya Gisenyi mu karere ka Rubavu,  hafungiye  uwitwa Uzayisenga  Senzira w’imyaka 28 y’amavuko usanzwe ukora akazi k’ubucuruzi buciriritse,  ukekwaho  kwinjiza mu gihugu , gucuruza  no gukwirakwiza urumogi mu baturage. Uyu mugabo yafashwe mu ijoro ryo ku italiki ya 21 Kamena , afatiwe mu mudugudu w’Iyobokamana, akagari ka Mbugangari, mu murenge wa Gisenyi.

Umuvugizi wa Polisi mu Ntara y’Iburengerazuba, Chief Inspector of Police(CIP) Theobald Kanamugire yemeje amakuru y’ifatwa ry’uyu mugabo aho agira ati, "Ni byo koko, twahawe amakuru n’abaturage ko uyu mugabo avanye ruriya rumogi hakurya y’umupaka aruzanye mu Rwanda, tumutegera mu nzira yari yanyuzemo turamufata nyuma yo kumusangana urugera ku biro 45, ubu hari gukorwa ibisabwa ngo ashyikirizwe ubutabera."

Kuri iki gikorwa, CIP Kanamugire akaba yashimye uko cyagenze kandi asaba abaturage bose gutanga amakuru hakiri kare kugira ngo habeho kurinda no kurwanya ikwirakwizwa ry’ibiyobyabwenge mu Rwanda kuko ibifatwa hafi ya byose biba byaturutse mu turere duturanye n’imipaka. Inkuru yose

Gatsibo: Abacukura amabuye y’agaciro mu buryo bunyuranyije n’amategeko bari mu maboko ya Polisi

Polisi y’u Rwanda mu karere ka Gatsibo ifungiye kuri Sitasiyo ya Rugarama abagabo 30 yafashe ku itariki 21 z’uku Kwezi bacukura amabuye y’agaciro yo mu bwoko bwa Gasegereti mu buryo butubahirije amategeko.

Abafashwe barimo kuyacukura mu mirima y’abaturage n’ibyanya bya Leta biri mu kagari ka Matunguru, mu murenge wa Rugarama.

Umuvugizi wa Polisi mu Ntara y’i Burasirazuba, Inspector of Police (IP) Jean Bosco Dusabe yavuze ko abo bagabo bafatiwe mu bikorwa bya Polisi byo kurwanya ubucukuzi bw’amabuye y’agaciro bunyuranyije n’amategeko n’ibindi byaha birimo kwishora mu biyobyabwenge.

Yatanze ubutumwa bukangurira abatuye iyi Ntara kwirinda gucukura amabuye y’agaciro mu buryo butubahirije amategeko agira ati," Ibyo bikorwa byangiza ibidukikije, kandi ingaruka zabyo zigera ku batari bake." Inkuru yose

Ababyeyi, abarezi n’abanyeshuri bo muri Kayonza basabwe kurwanya imirimo ivunanye ikoreshwa abana

Mu muhango wo kwizihiza umunsi mukuru w'umwana w'umunyafurika  wabaye mu mpera z’icyumweru gishize, Polisi y’u Rwanda ikorera mu karere ka Kayonza n’ubuyobozi bw’aka karere baganirije ababyeyi, abarezi n’abanyeshuri bo mu bigo by'amashuri  by’umurenge wa Mukarange aribyo G.S Kayonza, G.S. Mukarange Cathoric, Kayonza Vocation Academy na Victorious Academy School, bose hamwe bageraga ku bihumbi bitanu, baganirizwa ku kwirinda no kurwanya imirimo  ikoreshwa abana, ihohoterwa rishingiye ku gitsina, iryo mu ngo, amakimbirane n’ibiyobyabwenge.

Ushinzwe imiyoborere myiza mu karere ka Kayonza Rurangwa Jean Paul wari witabiriye ibi biganiro yarababwiye ati; :”Buri wese akwiye kumenya uburenganzira bw’ibanze bw’umwana, akamenya ko umwana afite uburenganzira bwo kwiga, kwidagadura, n’uburenganzira ku mutungo. Akaba ari muri urwo rwego rwo guhabwa uburenganzira, umwana wese agomba kurindwa gukoreshwa imirimo ivunanye.”Inkuru yose

Abapolisi bakuru biga mu ishuri rya Polisi y’u Rwanda (NPC) bari mu rugendoshuri muri Tanzaniya

Abapolisi bakuru baturuka mu bihugu icyenda bya Afurika biga mu ishuri rikuru rya Polisi y’u Rwanda (NPC) riri mu karere ka Musanze, batangiye urugendo shuri ruzamara icyumweru mu gihugu cya Tanzaniya, aho bateganya gusura ibigo bitandukanye birimo ibya Leta, ibyigenga n’inzego z’umutekano.

Uru rugendo shuri barutangiye kuwa mbere tariki ya 19 Kamena, aho basuye icyicaro gikuru cya Polisi ya Tanzaniya (Tanzania Police Force -TPF), bakaba barakiriwe n’umuyobozi mukuru wa Polisi ya Tanzaniya (Inspector General) Simon Sirro.

Mu ijambo yabagejejeho, yagarutse ku ruhare rw’imikoranire myiza y’ibihugu mu gukumira no kurwanya ibyaha no guhanahana ubumenyi.

Yagarutse kandi k’Ubumwe bwa Afurika, avuga ko abatuye ibihugu bya Afurika nabo bakwiye kugira ubumwe kugirango umugabane wacu urusheho kugira ubumwe no gutera imbere. Inkuru yose

Mufite uruhare runini mu guhindura imyitwarire y’abo muhagarariye - Guverineri Munyentwari

Guverineri w’Intara y’Iburengerazuba Munyentwari Alphonse arahamagarira  urubyiruko, abahagarariye abagore , abafite ubumuga n’abandi kugira uruhare mu kwibungabungira umutekano ndetse no gufatanya bya hafi n’inzego ziwushinzwe.

Ibi yabivuze kuri uyu wa mbere tariki ya 19 Kamena 2017, mu nama nyunguranabitekerezo y’intara yari ayoboye, yabereye mu murenge wa Bwishyura, akarere ka Karongi, mu nzu mberabyombi ya IPRC Karongi .

Uretse amatsinda yavuzwe haruguru yari yavuye mu turere twose tw’Intara y’Iburengerazuba, iyi nama yari yitabiriwe n’umuyobozi wa Polisi mu Ntara y’Iburengerazuba, ACP Emmanuel Karasi ndetse n’ubuyobozi bw’akarere ka Karongi yari yabereyemo.

Mu ijambo yagejeje ku bari bitabiriye iyi nama, Guverineri Munyantwari yavuze ko buri wese muri iki gihugu afite uruhare mu guharanira ko habaho umutekano usesuye.

By’umwihariko yasabye abayobozi b’amatsinda atandukanye y’urubyiruko n’abahagarariye abandi muri iyi nama kugira uruhare mu kwamagana ibyaha bitandukanye ndetse n’akarengane kagaragara hirya no hino mu muryango nyarwanda ku bw’imyumvire yaba ikiri hasi. Inkuru yose

Urubyiruko rwo mu Ntara y’i Burasirazuba rwasabwe kuba umusemburo w’iterambere n’umutekano birambye

Urubyiruko rugera kuri 400 ruhagarariye urundi mu Ntara y’i Burasirazuba rwasabwe kuba umusemburo w’impinduka nziza ziganisha ku iterambere n’umutekano birambye.

Ubu butumwa babuherewe mu nama bagiranye ku itariki 18 z’uku Kwezi n’Umuyobozi w’iyi Ntara, Judith Kazaire. Iyo nama yabereye mu kagari ka Nyagatovu, mu murenge wa Mukarange, mu karere ka Kayonza.Yitabiriwe n’Abayobozi b’Inzego z’umutekano barimo Umuyobozi wa Polisi muri iyi Ntara, Assistant Commissioner of Police (ACP) Dismas Rutaganira.

Umuyobozi w’iyi Ntara yasabye urwo rubyiruko guharanira buri gihe icyarushaho guteza imbere igihugu, ndetse n’icyatuma gikomeza kurangwamo ituze, amahoro n’umutekano. Inkuru yose