POLISI Y'U RWANDA

Umuyobozi Mukuru wungirije wa Polisi y’u Rwanda (DIGP) ushinzwe ubutegetsi n’abakozi, DCG Jeanne Chantal Ujeneza, kuri uyu wa Kane tariki ya 24 Mata, yasoje ku mugaragaro inama y’ amashami agize umuryango uhuza abayobozi bakuru ba Polisi mu Karere k’Afurika y’Iburasirazuba (EAPCCO organs meeting) yagarutse ku ngamba z’ubufatanye mu kurwanya ibyaha byambukiranya imipaka n'iterabwoba.

Mu ijambo yavuze asoza inama ku mugaragaro, DIGP Ujeneza yavuze ko ibyaha bitagira umupaka, bityo ko hasabwa guhuriza hamwe imbaraga mu kubirwanya  by'umwihariko ibyaha byambukiranya umupaka n’iterabwoba mu Karere.

Yagize ati: “Abashinzwe kubahiriza amategeko bakeneye kuzamurirwa urwego binyuze mu kongera ubushobozi, ibikorwa ndetse n'imyitozo bihuriweho bigamije kuzamura ubumenyi bwabo mu gushyira mu bikorwa inshingano zabo.”

DIGP Ujeneza yashimiye ibikorwa byaranze abitabiriye inama za komite zitandukanye z’umuryango wa EAPCCO arizo Komite Mpuzabikorwa Ihoraho, Komite ishinzwe kurwanya Ibyaha by’ikoranabuhanga, Ishinzwe Amahugurwa, Komite ishinzwe guteza imbere uburinganire, ishinzwe amategeko na Komite ishinzwe kurwanya iterabwoba.

Umuhuzabikorwa w’Ubunyamabanga bw’Umuryango wa EAPCCO akaba n’umuyobozi wa Polisi Mpuzamahanga (Interpol) mu Karere, Africa Sendahangarwa Apollo, yavuze ko imyanzuro yafatiwe muri iyi nama itanga icyizere cyo kuzakomeza umusingi w’iterambere ry’ubufatanye hagati y’ibihugu bigize umuryango wa EAPCCO, ashimira n’uruhare rw’ibihugu bigize umuryango mu gutuma imyanzuro ifatwa ibasha gushyirwa mu bikorwa.

Yashimangiye ko igihe cyose ari ngombwa ko habaho gushyira hamwe kw’akarere n’inshingano rusange, kandi ko Ubunyamabanga bw’Umuryango wa EAPCCO buzakomeza gukurikirana no kugaragariza abagize umuryango aho ishyirwa mu bikorwa ry’imyanzuro yafashwe rigeze.