POLISI Y'U RWANDA

Ikipe ya Polisi  ya Handball, ifite igikombe cya shampiyona cy’umwaka ushize wa 2014, none tariki ya 21 Werurwe, yatangiye irushanwa ry’uyu mwaka itsinda y’ishuri rya GS St Aloys ry’i Rwamagana  ibitego 37 kuri 24.

Muri uyu mukino wabereye ku kibuga cya Kimisagara, ikipe ya Polisi niyo yayoboye umukino dore ko igice cya mbere cyarangiye ari ibitego 19 kuri 12 naho icya kabiri cyo kikaba cyararangiye ku bitego 18 by’ikipe ya Polisi kuri 12 bya St. Aloys.

Muhawenayo Jean Paul, umusore uherutse kugurwa n’ikipe ya Polisi, niwe wahize abandi mu gutsinda ibitego byinshi dore ko muri uyu mukino yatsinze ibitego 10, akurikiwe na Tuyishime Zachary ufite 7, Mutuyimana Gilbert na Duteteriwacu Norbert bafite ibitego 5 buri wese, aba basore nabo akaba ari abakinnyi b’ikipe ya Polisi.

Umutoza mukuru  w’ikipe ya Polisi, AIP Antoine Ntabanganyimana, afitiye ikizere abasore be bazakomeza kwitwara neza no muyindi mikino, ndetse ko icyo bifuza ari ugukomeza kwibikaho ibikombe bitandukanye nkuko babigaragaje umwaka ushize.

Yagize ati: “Abakinnyi bakinnye neza ndetse bagaragazaga ko bashaka itsinzi muri uyu mukino. Iri shyaka niryo ryaranze abakinnyi banjye n’umwaka ushize, turizeza abakunzi bacu kuzakomeza kwitwara neza ndetse tukegukana n’ibindi bikombe bitandukanye”.

Umutoza wa Police Handball club yakomeje avuga ko hari amaraso mashya yongerewe mu ikipe muri aba hakaba harimo, umunyezamu witwa Bananimana Samuel.

Umwaka ushize Police Handball club yihariye ibikombe birindwi bikubiyemo igikombe cyo kwibuka Jenocide yakorewe abatutsi muri 1994, igikombe cy’umunsi w’abakozi, Sulfo Beach, Carre d’ AS, icya Rwanda Cup ndetse n’icya shampiyona.

Muri uyu mwaka ikipe ya Polisi ya Handball, imaze kwegukana ikindi gikombe cyiswe Impano n’Impamba, iki ikaba yaracyegukanye mu kwezi kwa Mutarama.

Kuva yabona Izuba mu 2003, ikipe ya Polisi ya Handball, imaze gutsindira ibikombe 22, ibi byose ikaba ibifite mu bubiko bwayo.

Uku niko amakipe azahura nkuko ingengabihe y’uyu mukino ibigaragaza

21-3-2015:      Police vs GS St Aloys -   Rwamagana

29-3-2015:      GS Rambura vs Police -   Rambura

4-4-2015:        Police vs APR                 Kimisagara

18-4-2015:      ES Kigoma vs Police.     Kigoma

26-4-2015:      Police vs Gicumbi           Amahoro

2-5-2015:        ES Urumuri vs Police.     Birambo

9-5-2015:        Police vs Nyakabanda     Amahoro

 16-5-2015:     Rambura vs Police         Rambura

 23-5-2015:    Police vs CE.                   Kimisagara

 31-5-2015:   College Inyemeramihigo vs Police.      Rubavu

 6-6-2015:     Police vs CASS.                  Kimisagara