POLISI Y'U RWANDA

Ikipe ya Polisi ya Handball kugeza ubu itaratsindwa umukino n'umwe kuva shampiyona y'uyu mukino yatangira, ikomeje kubona intsinzi  dore ko none tariki ya 19 Mata, yatsinze ikipe ya ES Kigoma ibitego 26 kuri 15.

Igice cya mbere cyarangiye ikipe ya Polisi ifite ibitego 14 ku icyenda bya ES Kigoma muri byo bitandatu bikaba byatsinzwe n'umukinnyi Dutereriwacu Norbert wa Polisi.

Mu gice cya 2, ikipe ya Polisi yagitangiye ifite ubukana bwinshi, ibi bikaba byayihesheje gutsinda ibindi bitego cumi na bibiri, umukino uza kurangira ibonye intsinzi y'ibitego 26 kuri 15 bya ES Kigoma.

Muri uyu mukino, Tuyishime Zachary ukinira ikipe ya Polisi yatsinze ibitego bibiri ndetse akaba ariwe uyoboye abandi mu gutsinda ibitego byinshi kuko afite ibitego 26 mu mikino ine imaze gukinwa muri shampiyona y'uyu mwaka.

Ikipe ya Polisi ya Handball imaze gutsinda imikino 10 mu marushanwa atandukanye amaze kuba muri uyu mwaka.

Umutoza w'ikipe ya Polisi, Assistant Inspector of Police (AIP) Antoine Ntabanganyimana, yavuze ko n'ubwo ikipe ye yatsinze uyu mukino ko batabashije kwerekana umukino mwiza kuko bakinnye mu mvura nyinshi.

Yakomeje avuga ko ikipe ye mu marushanwa y'umwaka ushije yabashije kwibikaho ibikombe birindwi ndetse ikaba yaratsinzwe umukino umwe gusa.

Yakomeje agira ati, "Dufite umukino ukomeye tuzahura n'ikipe ya Gicumbi, mu cyumweru gitaha, tunafite kandi undi mukino mu kwezi kwa Kamena w'irushanwa ryo kwibuka abakinnyi bishwe muri Jenoside yakorewe abatutsi mu 1994. Turimo  kwitegura iyi mikino kandi twiteguye ku zitwara neza".

Iyi niyo ngengabihe yerekano amakipe azahura n'ikipe ya polisi

21-3-2015: Police 37-24 GS St Aloys -  Rwamagana

29-3-2015: GS Rambura 17-52 Police - Rambura

04-4-2015: Police 17-14 APR                Kimisagara

18-4-2015: ES Kigoma 15-26 Police     Kigoma

26-4-2015: Police vs Gicumbi               Amahoro

02-5-2015: ES Urumuri vs Police          Birambo

09-5-2015: Police vs Nyakabanda         Amahoro

16-5-2015: Rambura vs Police               Rambura

23-5-2015: Police vs CE.                         Kimisagara

31-5-2015: College Inyemeramihigo vs Police.      Rubavu

06-6-2015: Police vs CASS.                          Kimisagara