POLISI Y'U RWANDA

Umuyobozi Mukuru wa Polisi y’u Rwanda (IGP), CG Felix Namuhoranye ari muri Leta Zunze Ubumwe z’Abarabu (UAE), aho agirira uruzinduko rw’akazi rugamije gushimangira ubufatanye mu by’umutekano n’iyubahirizwa ry’amategeko hagati y’ibihugu byombi.

Ku munsi w’ejo, tariki ya 23 Gicurasi, IGP Namuhoranye ari kumwe na Ambasaderi w'u Rwanda muri icyo gihugu, John Mirenge, bakiriwe n'umuyobozi mukuru wa Polisi ya Abu Dhabi, Maj. Gen Faris Khalaf Al Mazrouei.

Bagiranye ibiganiro byibanze ku kubaka ubufatanye bukomeye hagati ya Polisi y’u Rwanda n’iya Abu Dhabi hagamijwe kunoza imikorere mu gucunga umutekano ijyanye n’igihe mu byiciro bitandukanye.

Polisi y’u Rwanda yafashe ingamba zitandukanye zo guhangana n’ibyaha bigenda bifata intera uko isi irushaho gutera imbere mu ikoranabuhanga zirimo n’Ubufatanye na Polisi n’izindi nzego z’umutekano zo mu bindi bihugu, bufatwa nk’inkingi yo gukumira no kurwanya ibyaha byambukiranya imipaka.