POLISI Y'U RWANDA

Guhera tariki ya 07 kugeza ku ya 08 Nyakanga 2026, Umuyobozi Mukuru wa Polisi y’u Rwanda CG Felix Namuhoranye yitabiriye inama ibera ku cyicaro gikuru cy’Umuryango w'Abibumbye (UN) i New York, ihuriza hamwe abayobozi ba Polisi n’abandi bayobozi batandukanye (UNCOPS2026).

Iyi nama mpuzamahanga iteranye ku nshuro ya Gatanu, ikaba ihuriza hamwe Abakuru ba Polisi n’aba Jandarumori, Abaminisitiri, hamwe n'ubuyobozi bukuru bw'Umuryango w'Abibumbye, bagatanga urubuga rw'ingenzi rubahuza kugira ngo barebere hamwe ibibazo bishya bigenda bivuka, basangizanya ubunararibonye n'imikorere myiza, ndetse banashyiraho icyerekezo gishya kizayobora imikorere ya Polisi ya Loni n'ubufatanye bwayo bukomeza gukomera n'inzego z'igihugu zishinzwe kubahiriza amategeko.

Intego y’iyi nama ikubiye ngingo zitandukanye zirimo; Kugaragaza isano n'inyungu zituruka ku bufatanye hagati y'umurimo ukorerwa muri Polisi ya Loni n'umurimo ukorerwa muri Polisi z'ibihugu, mu guhangana n'ibibazo bikomeye byugarije isi muri iki gihe; Gutanga icyerekezo cy'ingamba ku ruhare rwa Polisi ya Loni muri iki gihe no mu gihe kizaza.

Gushimangira ubushake bwa Polisi ya Loni bwo kurushaho guteza imbere ubufatanye n'imiryango yo mu rwego rw'uturere n'iyo ku rwego mpuzamahanga, ndetse n'inzego z'ibihugu zishinzwe kubahiriza amategeko; Guteza imbere guhanga udushya, ubunyamwuga, n'imikorere inoze; no Kurushaho gushimangira uruhare rwa Polisi mu gukumira amakimbirane no kubungabunga amahoro arambye.

Inama yabaye kandi intangiriro y'ibiganiro bigari bihuza ibihugu bigize Umuryango w'Abibumbye, indi miryango mpuzamahanga n'iyo mu turere, ibigo by'ubushakashatsi n'ibitekerezo (think tanks), ndetse n'amashuri makuru na za kaminuza. Ibi biganiro bigamije gutegura icyerekezo gishya cya Polisi ya Loni kizayobora ingamba zayo n'imikorere yayo, mu gihe isi ihanganye n'igabanuka ry'umutungo n'ubushobozi, ariko hakaba hakomeje kwiyongera icyifuzo cyo gukoresha Polisi ya Loni haba mu bikorwa byo kubungabunga amahoro no mu bindi bikorwa bitari mu butumwa bwihariye bwa Loni. 

Mu kiganiro yitabiriye, Umuyobozi Mukuru wa Polisi y’u Rwanda, CG Felix Namuhoranye, yagarutse kwikoreshwa ry’Ikoranabuhanga ry’Ubwenge buhangano (AI) mu iperereza rikorerwa ahakorewe icyaha, uburyo bwo guhuza kamera zigezweho zambarwa ku mutwe zidafashwe n’amaboko n’ibindi bikoresho byifashisha AI haba hari amahirwe yo kurushaho kunoza imicungire y’ahakorerwa icyaha. Yabibukije ko ikoranabuhanga ridahindura gusa uburyo iperereza ry'ibimenyetso bya gihanga rikorwa, ahubwo rinasobanura ubundi buryo bushya bwo gushakamo ukuri, kubazwa inshingano no gutanga ubutabera.

Yagize ati: “Mu Rwanda inzego zishinzwe iyubahirizwa ry’amategeko ntizibona ikoranabuhanga rigezweho nk’iryo gushyirwa mu bikorwa gusa, ahubwo rigomba kugenzurwa neza ko ryizewe, rifite umutekano kandi rihuye n'amahame agenga ubutabera n'ubuyobozi bwubahiriza amategeko. Bityo, urugendo rwo kwimakaza ikoranabuhanga rigezweho rigakomeza kubyazwa umusaruro mu buryo burushaho kurinda umutekano w'abaturage no kongera icyizere bafitiye inzego z'ubutabera.”

Yakomeje agira ati: “Twifashishije ubushobozi bw'ubwenge buhangano n'ikoranabuhanga rigezweho mu iperereza rya gihanga, turimo kubaka uburyo bw'ubutabera mpanabyaha burushaho gukora neza, bukorera mu mucyo kandi bwizewe, kugira ngo ubutabera butangwe uko bikwiye.”

CG Namuhoranye yavuze ko gukoresha ubwenge buhangano mu iperereza rya gihanga bisaba ingamba zikomeye zituma habaho gukorera mu mucyo, kubazwa inshingano, kurinda ubuzima bwite bw'abaturage no kubahiriza uburenganzira bwa muntu; kandi ko ubwenge buhangano butasimbura ubushishozi n'ubunyamwuga bw'abakora iperereza, ahubwo ko bubushyigikira kugira ngo iperereza rirusheho kuba rinoze kandi ryizewe.