POLISI Y'U RWANDA

Mu ishuri rikuru rya Polisi y’u Rwanda (NPC) riherereye mu karere ka Musanze, kuri uyu wa Gatanu tariki ya 03 Nyakanga 2026, hasojwe amahugurwa yo ku rwego rwa ba Ofisiye bato 45 bari bamazemo amezi atanu (5) biga ibijyanye n’ubuyobozi no gukemura amakimbirane.

Ni amahugurwa y’icyiciro cya 14 ahabwa ba ofisiye bato (Police Junior Command and Staff Course-PJCSC), baturuka mu nzego zishinzwe kugenzura iyubahirizwa ry’amategeko, barimo; abo muri Polisi y’u Rwanda 33, abo mu rwego rw’igihugu rushinzwe igorora (RCS) batanu (5), abo mu rwego rw’igihugu rw’Ubugenzacyaha (RIB) 5 na babiri bo mu rwego rw’igihugu rushinzwe iperereza n’umutekano (NISS). 

Umuhango wo gusoza aya mahugurwa, wayobowe n’Umuyobozi Mukuru wa Polisi y’u Rwanda (IGP), CG Felix Namuhoranye, yababwiye ko imiterere y’umutekano igenda ihinduka umunsi ku wundi bityo ko bagomba guhora biteguye guhangana n’ibibazo bishobora guterwa n’izo mpinduka. 

Yagize ati: “Ibihe turimo muri iki gihe byarahindutse, ibibazo twahuraga nabyo by’umutekano mu bihe byashize sibyo duhura nabyo uyu munsi. Murasabwa guhindukana n’ibihe rero kuko ibyaha bikorwa ubu kenshi bikorwa hifashishijwe ikorabnabuhanga n’imbuga nkoranyambaga.”

Yakomeje agira ati: “Kera umujura yashoboraga kwiba banki aruko ayitoboye, ariko ubu asigaye ayiba yifashishije ikoranabuhanga, bityo birasaba ko mujyana n’igihe cy’aho isi igeze mu ikoranabunga mukarimenya birushijeho kugira ngo mubashe guhangana na bene ibyo byaha.”

IGP Namuhoranye yabasabye gukorana  n’abaturage mu rwego rwo kumenya amakuru yibibera aho bakorera kuko bizabafasha gukemura ibibazo bijyanye n’ibyaha bigaragara muri sosiyete.

Yagize ati: “Igihe tugezemo n’icyo gukorana n’abaturage twubaka icyizere hagati yacu na bo, batubona bakatubonamo ibisubizo aho kutwikanga nka kera, ahubwo nibatubona bishimire kudusangiza amakuru ajyanye n’ibyahungabanya umutekano ndetse dufatanye no mu bikorwa by’iterambere n’imibereho myiza. Ubu aho tugeze si ukuba hafashwe abanyabyaha benshi ahubwo ni ukuba harwanyijwe ibyaha byinshi; nk’abayobozi b’ejo hazaza mugomba guhindura imikorere mukajyana n’igihe tugezemo."

 
Commissioner of Police (CP) Christophe Bizimungu, uyobora Ishuri rikuru rya Polisi, yashimiye abasoje amasomo uburyo bitwaye abibutsa kuzakoresha neza ubumenyi bungutse bazamura urwego rw’imikorere y’igihe tugezemo.

Yagize ati: “Mugiye gusubira aho mwakoreraga, muzashyire mu bikorwa amasomo mwize mwunganira inzego mukorera, mutanga inama nyazo zizana impinduka, munatekereza bijyanye n’igihe kuko igihe turimo cyihuta mu iterambere ry’ikoranabuhanga.”

CP Bizimungu yashimiye ubuyobozi, abarimu n’abandi bose bakorera mu ishuri rikuru rya Polisi, ubwitange, umuhate n’ubunyamwuga bagaragaje byatumye aya mahugurwa agenda neza.