Kinyarwanda
English
Umuyobozi Mukuru wa Polisi y'u Rwanda (IGP), CG Felix Namuhoranye, kuri uyu wa Mbere tariki ya 27 Mata, ari mu ruzinduko rw'akazi agirira mu gihugu cya Singapore.
Hamwe n'Umunyamabanga Mukuru w'Urwego rw'Igihugu rw'Ubugenzacyaha (RIB), Col (Rtd) Pacifique Kayigamba Kabanda bari kumwe muri uru ruzinduko, na Ambasaderi w’u Rwanda muri Singapore, Nyakubahwa Innocent Muhizi, bagiranye ibiganiro n’Umuyobozi Mukuru wa Polisi ya Singapore, How Kwang Hwee.
Ni ibiganiro byabereye ku cyicaro gikuru cya Polisi ya Singapore, byagarutse ku gushimangira ubufatanye, guteza imbere ikoreshwa ry’ikoranabuhanga mu kazi ka Polisi n’ingamba zo guhangana n'ibyaha by'inzaduka.
Muri uru ruzinduko kandi intumwa z’u Rwanda zizitabira inama izwi ku izina rya MilipolTechX Summit mu rurimi rw'icyongereza ihuza inzego zishinzwe umutekano izamara iminsi itatu.
Ni inama igamije kurebera hamwe uburyo bwo guteza imbere ubutwererane mpuzamahanga mu bijyanye n’umutekano binyuze mu guhanga udushya mu ikoranabuhanga rigezweho kandi ritanga umusaruro.
Polisi y'u Rwanda n'iya Singapore, inzego zombi zashyize umukono ku masezerano y'ubufatanye muri Kanama 2022 muri gahunda zitandukanye zirimo; amahugurwa, kungurana ubumenyi, guhanahana amakuru no kugirana ubufatanye mu bikorwa by’umutekano.
Amasezerano y’ubufatanye kandi akubiyemo no kongera ubushobozi bw’inzego z’ibihugu byombi mu byerekeranye no kurwanya ibyaha ndengamipaka, ibyaha by’ikoranabuhanga, icuruzwa ry’abantu, ihohoterwa rishingiye ku gitsina rikorerwa abana hifashishijwe murandasi, kurwanya ibyaha by’ iyezandonke, kubumbatira umutekano n’ituze rusange; kurwanya no gukumira magendu n’ubucuruzi bw’intwaro, amasasu n’ibindi.
