POLISI Y'U RWANDA

Umuyobozi mukuru wa Polisi y’u Rwanda (IGP) Emmanuel K. Gasana, yashimye Urubyiruko rw’abakoranabushake mu kwicungira umutekano kubera uruhare bagira mu kwicungira umutekano n’imikoranire bafitanye n’inzego z’umutekano.

Ibi uyu muyobozi yabivugiye mu nama yagiranye n’abahuzabikorwa b’uru rwego rw’urubyiruko baturutse muri buri karere, bari kumwe na komite nshingwabikorwa yabo ku rwego rw’igihugu, ndetse iyi nama ikaba yari yanitabiriwe n’abapolisi bashinzwe imikoranire myiza n’ubufatanye hagati ya Polisi y’u Rwanda, abaturage n’izindi nzego mu kurwanya no gukumira ibyaha mu turere twose tw’igihugu, ikaba yabereye ku cyicaro gikuru cya Polisi y’u Rwanda ku Kacyiru ku itariki ya 22 Kamena 2017.

IGP Gasana yashimye urwo rubyiruko, n’abandi bafatanyabikorwa ba Polisi y’u Rwanda ndetse n’abanyarwanda bose, uruhare bagira mu gukumira no kurwanya ibyaha, n’umurava no kwitanga izi nzego zose zagaragaje mu bikorwa byaranze icyumweru cyahariwe ibikorwa bya Polisi(Police week).

Mu cyumweru cyahariwe ibikorwa bya Polisi, uru rubyiruko rukaba rwarafashije abaturage batishoboye, aho rwabageneye amatungo n’ibiribwa.

Yabasabye gukomeza gukorana bya hafi n’inzego z’umutekano ndetse n’abaturage, kugirango habeho gukumira no kurwanya ibyaha ku buryo bunoze, bikazatuma u Rwanda rukomeza kuba igihugu gitekanye, kandi kihuta mu iterambere.

Ubwo yababwiraga ko bagomba gukora bafite intego n’icyerekezo, IGP Gasana yabahaye urugero rw’aho mu mwaka wa 1990 abanyarwanda batangiraga urugamba rwo kwibohora, aho yagize ati:”Abari ku rugamba rwo kubohora igihugu bashoboraga kunanirwa, ariko kubera ko bari bafite intego yo guharanira igihugu gitekanye kuri buri munyarwanda, ibi byabahaga imbaraga bagakomeza urugamba no guharanira kurutsinda.”

Yakomeje avuga ati:”Twari dufite intego n’icyerekezo bisobanutse, kandi twari tuzi neza icyo tugambiriye, ibi byaduhaga imbaraga, ari nabyo byatumye dukomeza urugamba kugeza ubwo dukuyeho ingoma y’igitugu.”

IGP Gasana yasabye uru rubyiruko gukura isomo kuri aya mateka y’u Rwanda, nabo bagaharanira kugira uruhare rugaragara mu iterambere ry’igihugu.

Yasoje asaba uru rubyiruko n’aba bapolisi ko buri gihe barangwa na disipuline, bakabera abandi urugero, anabizeza ko Polisi y’u Rwanda izakomeza kubaba hafi mu bikorwa byabo by’iterambere.

Kugeza ubu mu gihugu hose hari Urubyiruko rw’abakoranabushake mu kwicungira umutekano rugera ku bihumbi bibiri (2000), bakaba baharanira kugira igihugu kitarangwamo icyaha no gutera inkunga gahunda za Leta z’iterambere.