POLISI Y'U RWANDA

Ubukangurambaga ku kurwanya no gukumira ukwishora mu biyobyabwenge burakomeje nk’uko gahunda iteye mu cyumweru cya mbere cy’ukwezi kwahariwe ibikorwa bya Polisi y’u Rwanda mu mwaka wa 2018.

Ku wa kabiri tariki 16 z’uku kwezi, Polisi yatanze  ibiganiro mu bigo by’amashuri 23 byo mu turere dutandukanye; ababitanze bakaba baribanze ku bwoko bw’ibiyobyabwenge bikunze gufatirwa mu Rwanda, aho biva, ingaruka bigira ku babinywa, ababicuruza n’ababikoresha; n’uruhare rwabo mu kurwanya iyinjizwa ryabyo mu gihugu.

Kamonyi: Abanyeshuri biga mu Rwunge rw’amashuri rw’Isonga, urwa Remera- Indangaburezi, urwa Gacurabwenge Catholique n’urwa Nyamirembe, Ishuri ryisumbuye rya Mugina; abo mu Ishuri rya Jean de Pape Musambira, n’abiga mu Ishuri ribanza rya Gacurabwenge Protestant ni bo bagiranye ibiganiro na Polisi.

Gisagara: Ibigo by’amashuri Polisi yakozemo ubukangurambaga muri aka karere ni: Urwunge rw’amashuri rwa Ndora, urwa Mugombwa, urwa Cyamukuza, Ishuri ryisumbuye rya Muganza, ETS St Kizito n’Ishuri  ryisumbuye rya Higiro.

Rusizi: Muri aka karere, Abanyeshuri bagiranye ibiganiro na Polisi ni abiga muri  Koleji y’Abayisilamu ya Bugarama (College Islamic Bugarama), Urwunge rw’amashuri rwa Bugarama, urwa Butambamo n’abiga mu rwa Bweyeye.

Gatsibo: Abanyeshuri biga mu Rwunge rw’amashuri rwa Bihinga ni bo Polisi yaganirije ku ngaruka zo kwishora mu biyobyabwenge; kandi ibagira inama yo kubyirinda.

Bugesera: Ubukangurambaga ku kwirinda kwishora mu biyobyabwenge Polisi muri aka karere yabukoze mu ishuri ryitwa Blue Lakes International School n’Urwunge rw’amashuri rwa Mayange A.

Nyarugenge: Abanyeshuri Polisi yakanguriye kwirinda ibiyobyabwenge ni abiga muri Institut Flippo; iri shuri rikaba ryigamo abafite ubumuga bwo kutumva; ababigishije bakaba barakoresheje imvugo y’amarenga.

Ngoma: Ishuri Rikuru ry’Imyuga n’Ubumenyingiro, Ishami ryaryo rw’Iburasirazuba (IPRC - East) ni ho Polisi yakoreye ubukangurambaga ku kwirinda ibiyobyabwenge.

Rwamagana: Urwunge rw’amashuri rwitiriwe Mutagatifu Aloyizi (Groupe Scolaire St Aloys ) ni ho habereye ubukangurambaga ku ngaruka zo kwishora mu biyobyabwenge n’uruhare rw’abahiga mu kurwanya ikoreshwa n’icuruzwa ryabyo.

Aganira n’abiga muri IPRC – East , Umuyobozi wa Polisi mu karere ka Ngoma, Senior Superintendent of Police (SSP) Vita Hamza yabanje kubasobanurira icyo ikiyobyabwenge ari cyo; aha akaba yarababwiye ko gifatwa nk’ikiyobyabwenge mu Rwanda ikintu cyose gifite methanol irengeje igipimo cya zero n'ibice bitanu ku ijana (0.5%) mu bikigize; ikirengeje igipimo cya mirongo ine na gatanu ku ijana (45%) bya alukoro; ndetse n’ikinyobwa cyose cyateganywa nk’ikitemewe n’Amabwiriza ya Minisitiri ufite ubuzima mu nshingano ze nk’uko biteganywa n’Iteka rya Minisitiri w’Ubuzima Nº 20/35 ryo ku wa 09/6/2015 rigena ibinyobwa bitemewe n'ibindi bintu bicungwa kandi bifatwa nk’ibiyobyabwenge n'urusobe rw'imiti ikoreshwa nka byo.

Yagize ati,"Nk’uko byitwa , Ibiyobyabwenge  bitesha ubwenge uwabinyoye; hanyuma agakora ibyaha birimo gufata ku ngufu, gukubita no gukomeretsa n’ubujura  kuko  nta bwenge n’umutimanama aba afite. Ntushobora gutsinda mu ishuri; cyangwa ngo ugire icyo wimarira mu buzima unywa urumogi cyangwa ibindi biyobyabwenge. Mukwiriye kubyirinda niba mushaka ahazaza heza."

Mu kiganiro yagiranye n’abiga muri Groupe Scolaire St Aloys, Umuyobozi wa Polisi mu karere ka Rwamagana, Superintendent of Police (SP) Aphrodis Gashumba yababwiye ati,"Bamwe mu bangavu batwara inda bitewe no kunywa urumogi cyangwa ibindi biyobyabwenge. Kubyishoramo bigira izindi ngaruka zirimo kwandura zimwe mu ndwara zandurira mu mibonano mpuzabitsina; kureka ishuri no kuba ababyeyi imburagihe. Ubwo mumenye ingaruka zo kubyishoramo mubyirinde; kandi mukangurire urubyiruko bagenzi banyu kubyirinda."

Ahenshi mu bigo by’amashuri abanyeshuri bashyizeho amahuriro akora ubukangurambaga ku kwirinda ibiyobyabwenge binyuze mu mivugo, imbyino, indirimbo n’amakinamico.