POLISI Y'U RWANDA

Abofisiye bakuru ba Polisi 30 baturuka mu bihugu umunani byo muri aka karere ku  itariki 6 Nyakanga 2015 bashoje  amasomo bari bamaze umwaka bigira mu  Ishuri Rikuru rya Polisi y’u Rwanda (National Police College-NPC), ajyanye n’ubuyobozi bwabo bashinzwe ndetse n’indi mirimo ifitanye isano n’inshingano zabo (Senior Command and Staff Course).

Amasomo bize kimwe n’ibindi byiciro bibiri byababanjirije yibanze ahanini ku gufata ibyemezo nka bamwe mu bayobozi bakuru b’uru rwego rw’umutekano n’imicungire myiza y’abo bashinzwe, bakaba kandi  barahawe impamyabumenyi  y’icyiciro cya gatatu cya kaminuza mu bijyanye no kwimakaza umuco w’amahoro no gukemura amakimbirane.

Ibihugu aba bofisiye bakomokamo  ni :Uburundi, Ethiopia, Gambia, Kenya, Namibia, , Sudani y’Amajyepfo, Uganda, n’u Rwanda.

Minisitiri w’Umutekano mu gihugu, Sheikh Musa Fazil Harelimana, ni we washoje ku mugaragaro aya masomo akaba yarabahaye impamyabumenyi zigaragaza ko bize kandi bashoje ayo masomo.

Mu ijambo rye, Minisitiri Harelimana yagize ati:" Mu izina rya Perezida wa Repubulika y’u Rwanda,Nyakubahwa Paul Kagame,nshingiye ku bubasha mpabwa n’itegeko, mbahaye impamyabumenyi y’urwego rw’amasomo murangirije muri iri shuri ajyanye n’ubuyobozi bw’abo mushinzwe ndetse n’indi mirimo ifitanye isano n’inshingano zanyu".

Yakomeje agira ati:" Iyi n’indi ntambwe kandi n’ikimenyetso cyerekana ukuntu Polisi y’u Rwanda ishyira mu bikorwa intego n’inshingano byayo aribyo: kubungabunga umutekano w’abaturarwanda n’ibyabo kandi babigizemo uruhare no kongerera ubumenyi abapolisi mu ngeri zose".

Nk’uko yabwiye ibindi byiciro,Minisitiri Harelimana yabwiye iki cyiciro cya gatatu ko gusangira ubunararibonye no kwigira hamwe kw’abapolisi bo muri aka karere ari inkingi ya mwamba mu gufatanya kubumbatira umutekano muri aka karere.

Yongeyeho kandi ati:"Ubunyamwuga no gukora neza kandi mu mucyo, bituma iterambere ryihuta kuko abaturage baba bahabwa  serivisi nziza.Ndahamnya ndashidikanya ko ubumenyi mwungutse buzabafasha gusohoza inshingano zanyu neza ku neza y’abaturage b’ibihugu byanyu, abo muri aka karere, ndetse n’abo kuri uyu mugabane".

Yabwiye abo bofisiye bakuru ba Polisi 30 bashoje ayo masomo gukomeza ubufatanye no guhanahana amakuru no gusangira  ubunararibonye byabaranze kuva batangiye amasomo kugeza bayashoje.

Uyu muhango wo gusoza ku mugaragaro aya masomo witabiriwe n’abayobozi batandukanye barimo Minisitiri w’Ingabo z’u Rwanda,Gen. James Kabarebe,uw’Uburezi, Dr Papias Malimba Musafiri,n'Umuyobozi Mukuru wa Polisi y’u Rwanda,IGP Emmanuel K.Gasana.

Witabiriwe kandi n’Umunyamabanga Uhoraho w’akarere ka Teso ko mu gihugu cya Uganda, Christine Amongin Aporu,Umuyobozi Mukuru wa Polisi y’igihugu cya Gambiya,IGP  Ben Wilson , n’uwari ahagarariye igihugu cya Uganda ukora muri Ambasade yayo i Kigali, ACP Patrick Lawot.

Umuyobozi w’iri shuri,CP Felix Namuhoranye yagize ati:"Nk’ishuri,twizera ko gusangira ubunararibonye n’ubumenyi hagati y’abapolisi bo mu bihugu byo ku mugabane wa Afurika bizatuma turushaho kubungabunga umutekano mu bihigu byacu kandi bizatuma dukomeza kugira uruhare mu kuwugarura no kuwubungabunga ahandi ku Isi."

Yagize kandi ati:"Ubufatanye hagati y’ibihugu no gusangira ubunararibonye birakenewe kugira ngo dusigasire umutekano mu bihugu byacu , akaba ariyo mpamvu y’aya masomo agamije kongerera ubumenyi abapolisi bakuru bo mu bihugu byo muri aka karere bubashoboza gusohoza inshingano zabo neza."

Minisitiri Harelimana yahembye batatu mu bashoje ayo masomo babonye amanota ya mbere abo akaba ari CSP Robert Niyonshuti wa Polisi y’u Rwanda, CSP Mustafa Ndong wo mu gihugu cya Zambiya na SP Alungat Barbara wo mu gihugu cya Uganda.

CSP  Niyonshuti yavuze ko  ubudashyikirwa  abukesha gukora cyane no gufatanya na bagenzi be nk’itsinda ryari rifite intego imwe.

CSP Ndong yagize ati:"Ubushake bwatumnye nsoza neza aya masomo.Uretse amasomo nigiye muri iri shuri,nize n’ikindi kintu gikomeye mu gihe nari mu Rwanda aricyo imyitwarire myiza y’abapolisi b’u Rwanda, isuku mu gihugu hose, n’ubwitange ndetse n’umurava by’abaturage mu guteza imbere igihugu cyabo".

Uretse ibyo bigiye muri iri shuri kuva ku itariki 25 Kanama umwaka ushize, aba bofisiye bakuru bakoze kandi ingendoshuri mu Rwanda ndetse no mu bindi bihugu birimo ibyo bamwe muribo bakomokamo, mu rwego rwo guhaha ubumenyi muri ibyo bihugu mu bijyanye n’ibyo bize ndetse n’ibyo bashinzwe muri rusange.

Aho basuye mu Rwanda harimo: Ikigo cy’igihugu gishinzwe imiyoborere (RGB), Komisiyo y’igihugu  Ishinzwe Ubumwe n’ubwiyunge (NURC), Minisiteri ishinzwe gucyura impunzi no kurwanya ibiza (MIDIMAR), uruganda rukora amakaro ruherereye mu karere ka Nyagatare (East African Granite Industries) ndetse n’uruganda rw’Inyange.

Hanze y’u Rwanda, aba bofisiye bakuru ba Polisi zo mu bihugu  byo muri aka karere bakoze ingendoshuri mu bihugu bya Kenya na Namibiya, aha muri Namibiya bakaba barakiriwe kandi bagirana ibiganiro n’Umuyobozi wa Polisi y’iki gihugu.