Kinyarwanda
English
Polisi y'u Rwanda ikorera mu turere twa Ngoma na Bugesera yakoze umukwabu kuri uyu wa Kane tariki ya 26 Werurwe wo gufata abanywa n'abacuruza urumogi maze ifatana abagabo bane udupfunyika 270 tw'urumogi.
Umuvugizi wa Polisi mu ntara y'Iburasirazuba, Chief Inspector of Police (CIP) Hamdun Twizeyimana yavuze ko ifatwa ry'aba bagabo ari amakuru yatanzwe n’abaturage, aho Nkundabagenzi Ezechiel w’imyaka 30 na Sebanani Samuel w’imyaka 27 bafatiwe mu karere ka Bugesera bafite udupfunyika 181 tw’urumogi naho Habimana Innocent w’imyaka 34 na Maniriho w'imyaka 24 bafatirwa mu karere ka Ngoma bafite udupfunyika 89 tw'urumogi.
Yagize ati: “Nkundabagenzi yari asanzwe azwiho ko ari umucuruzi w'urumogi, mu gihe cyo gukora umukwabu tukaba twaramusanganye udupfunyika 176 amaze kugurisha udupfunyika dutanu uwitwa Sebanani. Abaturage bavuga ko aba bombi babanje kurunywa mbere y'uko amuha utwo dupfunyika 5.”
Aba bandi bakekwa bombi bafatiwe mu gikorwa cyo kugenzura ko amabwiriza yashyizweho na leta yo gukumira ikwirakwizwa rya Coronavirus ko yubahirizwa.
Yagize ati: "Habimana yari atwaye igare ageze ku bapolisi baramuhagarika bamubaze impamvu arimo akora ingendo zidakenewe kandi bitemewe abura icyo asubiza bamusatse bamusangana udupfunyika 88 tw'urumogi ababwira ko aruguze kwa Maniriho ahita ajyana abapolisi mu rugo rwa Maniraho basanga asigaranye agapfunyika kamwe."
CIP Twizeyimana yibukije abaturage ko kuba hariho ikibazo cya Coronavirus bitavuze ko hari icyuho mu mutekano cyo guha amahirwe abanyabyaha.
Ati: "Abibwira ko ari uko bimeze baribeshya, Polisi iri maso n'uwahirahira gukora ibyaha ntibyamuhira. Abari bazi ko bagiye kuba rusahurira mu nduru basubize amerwe mu isaho."
Aba bose uko ari bane bashyikirijwe urwego rw'igihugu rw'ubugenzacyaha ngo bakurikiranwe ku byaha bakekwaho.
Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha. Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.
