POLISI Y'U RWANDA

Iyi ni incamake y'ibikorwa by'ingenzi Polisi y'u Rwanda yakoze mu cyumweru gishize : 

Icyumweru cya Polisi: Abapolisi n’abaturage bo mu Bugesera bahuriye mu muganda wo kurengera ibidukikije

Mu rwego rw’ibikorwa Polisi y’u Rwanda ikora hirya no hino mu gihugu bibanziriza isabukuru yayo y’imyaka 17; ku itariki ya 25 Gicurasi, ifatanyije n’abaturage b’umurenge wa Nyarugenge mu kagari ka Kabuye mu mudugudu wa Nyakabuye, bakoze umuganda wo gucukura imirwanyasuri mu mirima y’abaturage ahangana na hegitari 5. Uyu muganda ufite agaciro k’amafaranga ibihumbi 300 y’u Rwanda wari ugamije kurengera ibidukikije no guteza imbere imibereho myiza yabo. Soma inkuru irambuye

[AMAFOTO]: Icyumweru cyahariwe ibikorwa bya Polisi y’u Rwanda cyakomereje mu turere twa Kamonyi, Ngororero na Kicukiro

Kuwa kane tariki ya 25 Gicurasi, icyumweru cyahariwe ibikorwa bya Polisi y’u Rwanda byakomereje hirya no hino mu turere. Mu karere ka Kamonyi Polisi yahaye amashanyarazi aturuka ku mirasire y’izuba abaturage batuye mu cyaro.

Iki gikorwa kikaba cyarabereye mu murenge wa Nyarubaka, akagari ka Kambyeyi, umudugudu wa Nyagihamba. Imiryango 120 ndetse n’ikigo nderabuzima cya Nyagihamba bahawe ayo mashanyarazi.

Ni umuhango wayobowe na Minisitiri w’uburinganire n’iterambere ry’umuryango Madame Nyirasafari Esperance ari kumwe n’umuyobozi mukuru wa Polisi y’u Rwanda (IGP) Emmanuel K Gasana. Soma inkuruirambuye

AMAFOTO]: Amashanyarazi y’imirasire y’izuba yagejejwe mu mudugudu wa Buhara ho mu Bugesera

Muri gahunda yo gushyigikira iterambere, imibereho myiza y’abaturage n’umutekano, Polisi y’u Rwanda yakomereje ibikorwa bitegura isabukuru yayo ya 17 mu mudugudu wa Buhara, akagari ka Gihembe mu murenge wa Ngeruka , mu karere ka Bugesera kuri uyu wa gatatu taliki ya 24 Gicurasi.

Ni mu muhango wo gutaha ku mugaragaro amashanyarazi  akomoka ku mirasire y’izuba yashyizwe mu nzu 108 zo muri uriya mudugudu ndetse n’ikigo nderabuzima cya Mugorore mu murenge wa Juru, ukaba wayobowe n’Umunyamabanga wa Leta muri Minisiteri y’Ubutegetsi bw’igihugu, Alvera Mukabaramba ari kumwe na Commissioner of Police (CP) John  Bosco Kabera wari uhagarariye Polisi y’u Rwanda muri uwo muhango, abayobozi muri Polisi n’abo ku rwego rw’akarere ka Bugesera. Soma inkuru irambuye

[AMAFOTO]: Icyumweru cyahariwe ibikorwa bya Polisi: Abamotari bahawe ubutumwa bwo kubahiriza amategeko y’umuhanda

Mu gihe hakomeje  icyumweru cy’ibikorwa bya Polisi y’u Rwanda,  kuwa kabiri tariki ya 23 Gicurasi, hirya no hino mu turere,  Polisi y’u Rwanda n’abafatanyabikorwa bayo, bagejeje ubutumwa ku batwara abagenzi kuri moto bubakangurira kubahiriza amategeko y’umuhanda hagamijwe cyane cyane kwirinda impanuka.  Ni mu nsanganyamatsiko igira iti:” Abanyamaguru, abatwaye moto n’amagare ni abanyantege nke mu muhanda. Bahe agaciro n’uburenganzira bakwiye”.

Mu kiganiro yagejeje ku bamotari bakorera mu Mujyi wa Kigali, Umunyamabanga wa Leta muri Minisiteri y’ibikorwa remezo ushinzwe ubwikorezi Alexis Nzahabwanimana, yagize ati:” ikintu cyose cyatuma umuntu apfa kubera impanuka ntawakihanganira”. Ibi yabivuze nyuma y’uko ubuyobozi bw’ishami rya Polisi y’u Rwanda rishinzwe umutekano wo mu muhanda  bugaragaje ko bamwe mu bamotari bafite uruhare runini mu guteza impanuka bitewe no kwanga guhagarara igihe umupolisi abahagaritse ahubwo bakiruka, gutwara badafite ibyangombwa nka perimi n’ubwishingizi, kugenda nabi mu muhanda, n’ibindi. Soma inkuru irambuye

Nyarugenge: Minisitiri Tugireyezu yasabye abo Polisi yahaye amashanyarazi batuye mu mudugudu wa Mpanga kuyafata neza

Minisitiri muri Perezidansi ya Repubulika, Tugireyezu Venantia yasabye imiryango igize ingo 114 ituye mu mudugudu wa  Mpanga, akagari ka Runzenze, Umurenge wa Mageragere, ho mu karere ka Nyarugenge, gufata neza amashanyarazi bahawe na Polisi y’u Rwanda no kuyabyaza umusaruro.

Ibi Minisitiri Tugireyezu yabibabwiye ku wa kabiri tariki 23 Gicurasi mu muhango wo gutaha ku mugaragaro ayo mashanyarazi bagejejweho na Polisi muri gahunda ngarukamwaka y’ibikorwa by’ukwezi byayo byatangiye ku itariki 16 z’uku Kwezi bizasozwa n’isabukuru yayo y’impaka 17. Soma inkuru irambuye

[AMAFOTO]: Minisitiri Musoni yatashye amazi n’amashanyarazi byatanzwe na Polisi y’u Rwanda

Minisitiri w’ibikorwaremezo James Musoni yahamagariye abaturage b’akarere ka Rwamagana kurinda no gusigasira ibikorwaremezo bahawe na Polisi y’u Rwanda no kubyubakiraho ngo bazagere ku mibereho myiza n’iterambere birambye.  

Ibi Minisitiri Musoni yabivuze mu ijambo yagejeje ku bihumbi by’abaturage b’umudugudu wa Gatare, akagari ka Gatare mu murenge wa Nyakariro nyuma y’umuhango yayoboye, wo gutaha ku mugaragaro inzu 108 zahawe amashanyarazi akomoka ku zuba n’amavomero atatu y’amazi meza bitanzwe na Polisi y’u Rwanda mu rwego rw’ibikorwa byahariwe icyumweru cya Polisi cyatangiye taliki ya 16 Gicurasi. Soma inkuru irambuye

"Wihutaza umunyantege nke, na we afite uburenganzira bwo kugenda mu muhanda" - Polisi y’u Rwanda

Ubu butumwa yabutanze ku gicamunsi cyo ku itariki 21 Gicurasi mu kiganiro (Kubaza bitera kumenya) cyaciye kuri Televiziyo na Radiyo by’u Rwanda no kuri Radiyo z’abaturage ziri hirya no hino mu gihugu; aho Umuyobozi w’Ishami rya Polisi y’u Rwanda rishinzwe umutekano wo mu muhanda, Commissioner of Police (CP) George Rumanzi yavuze, ndetse anasobanura ibitera impanuka zo mu muhanda, uburyo bwo kuzirinda; kandi  akangurira abakoresha inzira nyabagendwa kubahiriza amategeko yo kuwugendamo no kuwutwaramo ibinyabiziga.

Muri icyo kiganiro CP Rumanzi yunganiwe n’Umwungirije ushinzwe abakozi, imari n’ibikoresho, Assistant Commissioner of Police (ACP) Rafiki Mujiji,  ndetse n’Umuvugizi w’iri Shami, Chief Inspector of Police (CIP) Emmanuel Kabanda. Soma inkuru irambuye