POLISI Y'U RWANDA

Iyi ni incamake y’amakuru y’ingenzi yanyuze ku rubuga rwa Polisi y’u Rwanda mu cyumweru gishize.

DIGP Marizamunda yahaye impanuro abakinnyi ba Police FC bitegura gutangira shampiyona

Mu gihe ikipe y’umupira w’amaguru ya Polisi y’u Rwanda (Police FC) yiteguraga gutangira Shampiyona y’icyiciro cya mbere mu mupira w’amaguru mu Rwanda yatangiye ku itariki ya 29 Nzeri, Umuyobozi wa Polisi wungirije ushinzwe imiyoborere n’abakozi (Deputy Inspector General of Police -DIGP) Juvenal Marizamunda kuwa gatatu tariki  ya 27 Nzeri yahuye n’abakinnyi n’abatoza ba Police FC, abasaba gukomeza umuhate no gukorera ku ntego muri uyu mwaka wa Shampiyona.

Umukino wa mbere Police FC yawukinnye kuwa gatandatu tariki ya 30 Nzeri na  Etincelles FC i Rubavu.

Inkuru irambuye

Meya Nyamurinda arasaba uruhare rwa buri wese mu kurwanya ibiyobyabwenge

Kuwa kabiri tariki ya  26 Nzeri, Polisi y’u Rwanda n'umujyi wa kigali bangije ibiyobyabwenge bitandukanye birimo kanyanga litiro 185, litiro ibihumbi bibiri z'inzoga zitemewe mu Rwanda,  n'ibiro 900 by'urumogi.

Iki gikorwa cyo kwangiza ibi biyobyabwenge cyabereye ku kimoteri cya Nduba kiri mu murenge wa Nduba akarere Ka Gasabo.

Ibi biyobyabwenge byangijwe, bikaba byarafatiwe  mu turere 3 tw'umugi wa Kigali mu gihe cy'amezi atatu. Inkuru irambuye

Intumwa zaturutse mu gihugu cya Mali zirigira kuri Polisi y’u Rwanda kurwanya ruswa

Itsinda ry’intumwa 4 zaturutse mu gihugu cya Mali, kuwa gatatu tariki ya  27 Nzeli zasuye Polisi y’u Rwanda zisobanurirwa ingamba Polisi y’u Rwanda yashyizeho mu kurwanya ruswa no gufasha gushyira mu bikorwa gahunda za Leta.

Izi ntumwa zaje ziyobowe na Moumouni Guindo uyobora ibiro by’igihugu bishinzwe kurwanya inyerezwa ry’ibya Leta ari kumwe n’abandi bavuye mu bugenzacyaha, no mu rukiko rw’ikirenga mu gihugu cya Mali, bakaba barakiriwe n’umuyobozi w’ishami rishinzwe gukumira no kurwanya ruswa n’ubugenzuzi bw’umurimo muri Polisi y’u Rwanda, ACP Jaen Nepo Mbonyumuvunyi. Inkuru irambuye

Abadepite bo muri Namibiya bashimye serivisi zitangwa na Isange One Stop Centre

Itsinda ry’intumwa z’abadepite baturutse mu gihugu cya Namibiya, kuwa kane tariki ya 28 Nzeri ryasuye ikigo  Isange One Stop Centre gishinzwe kwakira no gufasha abakorewe ihohoterwa rishingiye ku gitsina gikorera ku bitaro bya Kacyiru, basobanurirwa imikorere yacyo na Serivisi giha abakigana.

Aba badepite bavuze ko Isange One Stop Centre ari ikigo gitanga serivisi nziza ku buryo ibihugu bya Afurika bikwiye kukigiraho mu gukumira no kurwanya akarengane abagore n’abana bahura nako. Inkuru irambuye

Bugesera: Hafashwe litiro 780 za mazutu mu mukwabu wo kurwanya icuruzwa ryayo ritemewe

Polisi ikorera mu karere ka Bugesera yakoze umukwabu wo kurwanya icuruzwa ritemewe ry’ibikomoka kuri peteroli maze ifata amajerekani agera kuri 39 ya mazutu.

Umuvugizi wa Polisi mu Ntara y’Iburasirazuba, IP Jean Bosco Dusabe atangaza ko iyi mazutu yafashwe mu mikwabu itatu itandukanye yose yabereye mu murenge wa Rilima, ahanafashwe nibura abantu icumi  bafite aho bahuriye n’ubucuruzi bwayo. Inkuru irambuye

Polisi ya Rutsiro yahuguye abanyeshuri ba GS Congo Nile n’abarezi babo ku mikoreshereze y'umuhanda

Ku itariki ya 26 Nzeri, Polisi y’u Rwanda ikorera mu karere ka Rutsiro yakanguriye abanyeshuri b’Ishuri ryisumbuye rya Congo Nile n’abarezi babo bose hamwe barenga 1000 n’abagenzi muri rusange kubahiriza amategeko agenga imikoreshereze y’umuhanda, bakamenyera kunyura ku ruhande rw’ibumoso bw’umuhanda bakurikije icyerekezo bajyamo, kandi bakanyura buri gihe mu nzira yateganyirijwe abanyamaguru mu gihe ihari. Inkuru irambuye

Gasabo: Babiri bafunzwe bakurikiranyweho kwiba arenga miliyoni 2 mu rugo bakoragamo

Ku italiki 27 Nzeli, Polisi  ikorera mu karere ka Gasabo, Umurenge wa  Gatsata  yataye muri yombi abantu babiri  abibo Ngirimana Anicet w’imyaka 26 y’amavuko na Tumukunde Esther w’imyaka 19 y’amavuko, bakaba bakurikiranyweho kwiba amafaranga 2,500,000. Ubu bakaba bafungiye kuri sitasiyo ya Polisi ya Gatsata.

Polisi y’u Rwanda ikorera muri ako karere yatangaje ko aba bombi bari abakozi mu rugo rw’uwitwa Murenzi Guido utuye mu murenge wa Kacyiru, mu karere ka Gasabo ari naho bari bayibye ku italiki ya 26 Nzeri. Inkuru irambuye

Polisi y’u Rwanda iragira inama abacukura amabuye y’agaciro kwitwararika muri ibi bihe by’imvura

Polisi y’u Rwanda yongeye kugira inama abacukura amabuye y’agaciro n’abakoresha ibirombe kwitwararika igihe bari mu mirimo yabo kugirango birinde impanuka bashobora guhura nazo cyane cyane muri ibi bihe by’imvura.

Polisi y’u Rwanda kandi iranasaba ba Rwiyemezamirimo bafite ibirombe bicukurwamo amabuye y’agaciro gushyiraho ingamba zituma abakozi babo badahura n’impanuka no bakanubahiriza amategeko yose basabwa na Leta. Ubu butumwa buje nyuma y’impanuka ebyiri zabaye ku itariki ya 28 Nzeri zigahitana abantu babiri. Inkuru irambuye

Nyanza: Polisi ifunze umugabo ukekwaho kwiyita umukozi wa WASAC

Ku itariki ya 27 Nzeri, Polisi y’u Rwanda ikorera mu karere ka Nyanza, yataye muri yombi umugabo witwa Uwase Boniface w’imyaka 30 imukekaho kwiyitirira imirimo adakora, dore ko yiyitaga umukozi w’ Ikigo cy'Igihugu gishinzwe amazi n'isukura (Water and Sanitation Corporation -WASAC).

Uyu Uwase yafatiwe mu cyuho ubwo yari arimo kugerageza gukupa umuriro w’amashanyarazi mu murenge wa Mukingo ngo abone uko yiba insinga z’amashanyarazi, akaba yari yambaye imyenda bigaragara ko ari iy’ikigo cyahoze ari icy’’Igihugu gishinzwe Ingufu, Amazi, Isuku n’Isukura (Energy Water and Sanitation Authority-EWSA). Inkuru irambuye