POLISI Y'U RWANDA

Ibi bikurikira ni byo bikorwa by’ingenzi bya Polisi y’u Rwanda byo mu cyumweru gishize mu ncamake:

Abapolisi b’u Rwanda bari mu butumwa bw’amahoro muri Centrafrique bambitswe imidari y’ishimwe

Ku itariki ya 15 Nzeri, abapolisi b’u Rwanda 430 barimo ab’igitsinagore 58 bari mu butumwa bwo kugarura no kubungabunga amahoro n’umutekano mu gihugu cya Centrafrique, bambitswe imidari y’ishimwe kubera imyitwarire myiza n’ubunyamwuga byabaranze mu mirimo bashinzwe.

Umushyitsi mukuru muri uyu muhango yari Madane Najat Rochdi wungirije intumwa yihariye y’Umunyamabanga Mukuru w’Umuryango w’Abibumbye ushinzwe ibikorwa byo kurengera imibereho ya muntu mu butumwa bwo kubungabunga amahoro muri iki gihugu (MINUSCA-United Nations Multidimensional Integrated Stabilization Mission in Central Africa), hakaba hari n’abandi bayobozi muri MINUSCA, abahagarariye ubuyobozi bw’igihugu cya Centrafrique, abahagarariye inzego zishinzwe umutekano zaje kubungabunga amahoro muri iki gihugu, n’abahagarariye abanyarwanda baba muri   Centrafrique. Ibikurikiyeho

Polisi yakoreye ubukangurambaga bwo kurwanya ibiyobyabwenge mu Iseminari nto ya Rwesero

Mu rwego rwo gukomeza gahunda yo gukumira ibyaha cyane cyane ibiyobyabwenge n’ihohoterwa rishingiye ku gitsina n’irikorerwa mu ngo mu bigo by’amashuri, ku wa gatanu tariki ya 15 Nzeri, Polisi y’u Rwanda yaganiriye n’abanyeshuri hafi 400 biga mu Iseminari nto ya Mutagatifu Dominiko Saviyo yo ku Rwesero (Petit Seminaire Saint Dominique Saivio de Rwesero) iherereye mu murenge wa  Bukure, akarere ka Gicumbi, inasabana n’abo banyeshuri bakina umupira  w’amaguru.

Mu ijambo ry’ikaze,Umuyobozi w’iyi Seminari, Padiri Paul Gahutu yashimiye Polisi y’u Rwanda kuba yafashe uyu mwanya n’akazi kenshi ihorana, ikaza kuganira no gusabana n’abanyeshuri biga mu kigo ayobora. Ibikurikiyeho

Ngoma: ACP Rutaganira yasabye abatwara abagenzi gukomeza ubufatanye mu kubahiriza amategeko no kurwanya ibyaha

Umuyobozi wa Polisi y’u Rwanda mu Ntara y’i Burasirazuba, Assistant Commissioner of Police (ACP) Dismas Rutaganira, ku itariki ya 14 Nzeri yagiranye ikiganiro n’abatwara abagenzi mu modoka no kuri moto bakorera mu karere ka Ngoma, abashishikariza gukomeza gufatanya na Polisi mu kurwanya ibyaha no kubahiriza amategeko agenga umwuga wabo.

Yababwiye ati,"Umwuga wanyu ni ingirakamaro kandi uteza imbere igihugu, nyamara hari bamwe muri mwe batawuha agaciro bakanatesha ishema bagenzi babo, aho usanga bijandika mu byaha byo gutwara abagizi ba nabi kandi babizi, gutwara amagendu n’ibiyobyabwenge n’ibindi byaha bihungabanya umutekano."Ibikurikiyeho

Sudani y’Epfo: Abapolisikazi bari mu butumwa bw’amahoro barashima intambwe y’u Rwanda mu kubahiriza uburinganire n’ubwuzuzanye

Abapolisikazi bari mu butumwa bw’Umuryango w’Abibumbye muri Sudani y’Amajyepfo (UNMISS) barashima intambwe u Rwanda rwateye mu gushyira mu bikorwa ihame ry’uburinganire n’ubwuzuzanye bw’abagabo n’abagore.

Babivugiye mu nama y’iminsi ibiri bari bateraniyemo yarangiye kuwa kane tariki ya 14 Nzeri, aho bavuze ko n’ibihugu bakomokamo byakurikiza urugero rwiza rw’u Rwanda. Ibikurikiyeho

Kamonyi: Polisi yafashe ukekwaho kwiba amafaranga kuri Konti z’abatanga serivisi za Mobile Money

Miruho Isiaka afungiwe kuri Sitasiyo ya Polisi ya Runda, mu karere ka Kamonyi akekwaho kwiba amafaranga kuri Konti z’abatanga serivisi za Mobile Money bakorera muri aka karere.

Umuvugizi wa Polisi y’u Rwanda mu Ntara y’Amajyepfo, Inspector of Police (IP) Emmanuel Kayigi yavuze ko uyu mugabo w’imyaka 32 y’amavuko usanzwe ukora akazi ko gutwara abagenzi kuri moto mu Mujyi wa Kigali yafashwe ku itariki 14 z’uku kwezi afite Irangamuntu y’uwitwa Gasabubu Jean Damascene ibaruweho nimero ya telefone (Konti) yoherejweho ibihumbi 898 by’amafaranga y’u Rwanda yabikujwe mu buryo bw’ubujura kuri Konti z’abantu batatu batanga izi serivisi zo kubitsa no kuhererezanya amafaranga. Ibikurikiyeho

Gukumira iyinjizwa ry’ibiyobyabwenge mu gihugu: Polisi yafashe urundi rumogi rungana n’ibiro 230

Polisi y’u Rwanda ifatanyije n’izindi nzego ikomeje ibikorwa byo kurwanya ukwishora mu biyobyabwenge ifata ababyinjiza mu gihugu, ababitunda, ababicuruza n’ababikoresha mu buryo bumwe cyangwa ubundi; ibyo bikaba bijyana no gukangurira umuryango nyarwanya kwirinda kubyishoramo ibabwira ingaruka zabyo.

Ni muri urwo rwego ku itariki 14 Nzeri uyu mwaka yafashe ibiro 230 by’urumogi biturutse ku makuru yatanzwe n’abaturage; rukaba rwarafatiwe mu kagari ka Nengo, ho mu murenge wa Gisenyi, mu karere ka Ruvabu. Ibikurikiyeho

Ngoma: Hafatiwe urumogi rufite agaciro ka miliyoni zirenga 30, abarufatanywe berekwa abaturage

Nyuma y'aho mu ijoro ryo ku itariki ya 13 rishyira 14 Nzeri Polisi ifatanyije n'abaturage bafatiye mu murenge wa Mutenderi akarere ka Ngoma abasore babiri  ari bo: Iyamuremye Jean Baptiste w'imyaka 22 na Nduwimana Eric w'imyaka 18 binjizaga urumogi mu gihugu, uyu munsi aba basore beretswe abaturage, aba baturage banasabwa kurwanya no gukumira ibiyobyabwenge cyane cyane urumogi no kudahishira abarwinjiza mu gihugu.

Nk’uko bitangazwa na Polisi mu karere ka Ngoma,  aba basore bombi bari kumwe n'abandi 12, buri wese yikoreye umufuka mu gihe abandi babiri bagendaga babacungira aho inzego z’umutekano ziri; ariko aba bandi uko ari 12 babonye Polisi n'abaturage bahise bajugunya imifuka bari bikoreye ubu bakaba bagishakishwa. Urumogi rwari muri iyi mifuka uko ari 12 rupima ibiro 360, rukaba rufite agaciro ka Miliyoni zirenga 30 z'amafaranga y'u Rwanda. Ibikurikiyeho

Barindwi bafatanywe bimwe mu byibwe mu ishuri ryo muri Muhanga, mu byafashwe harimo Mudasobwa 9

Ku itariki 13 Nzeri uyu mwaka, Polisi y’u Rwanda mu karere ka Muhanga yafatanye abantu barindwi bimwe mu bintu byibwe mu Ishuri ribanza rya Bwirika riri mu murenge wa Cyeza; mu byafashwe hakaba harimo Mudasobwa icyenda zatanzwe muri gahunda ya Mudasobwa ku Mwana (Umunyeshuri).

Ubu bujura bwabaye mu ijoro ryo ku itariki 10 z’uku kwezi nk’uko bitangazwa n’Umuvugizi wa Polisi y’u Rwanda mu Ntara y’Amajyepfo, Inspector of Police (IP) Emmanuel Kayigi.

IP Kayigi yavuze ko mu byibwe muri iri shuri harimo Mudasobwa 11, telefone 5, indanguramajwi 4, imashini 1 ifotora impapuro, umupira w’amaguru 1, imyenda ya siporo 45, ipaki imwe y’ikiramu z’ubururu, bateri 1 n’indahuzo 2. Ibikurikiyeho

Muhanga: Hafungiye ukekwaho gukorera abanyeshuri inyemezabwishyu z’inyiganano z’amafaranga y’ishuri

Polisi y’u Rwanda mu karere ka Muhanga ifungiye kuri Sitasiyo ya Nyamabuye uwitwa Dukuzumuremyi Jean Baptiste ukekwaho gukorera abanyeshuri inyemezabwishyu z’inyiganano z’amafaranga y’ishuri.

Umuyobozi wa Polisi muri aka karere w’agateganyo, Chief Inspector of Police (CIP) Jean Bosco Karega yavuze ko iperereza ry’ibanze rigaragaza ko yari amaze gukorera abanyeshuri barindwi inyemezabwishyu zifite agaciro k’ibihumbi 546,500  by’amafaranga y’u Rwanda. Ibikurikiyeho

Polisi muri Gicumbi yafashe imodoka ipakiye litiro 495 za Kanyanga

Ku itariki 12 z’uku kwezi Polisi y’u Rwanda mu karere ka Gicumbi yafashe imodoka ifite nimero ziyiranga UAK 785 B ipakiye litiro 495 za Kanyanga.

Umuvugizi wa Polisi mu Ntara y’Amajyaruguru, Inspector of Police (IP) Innocent Gasasira yasobanuye uko izi nzoga zafashwe agira ati,"Polisi yamenye ko imodoka ebyiri ( iyi n’indi yayigendaga imbere) zirimo kwerekeza mu Rukomo ziturutse mu cyerekezo cya Gatuna; kandi ko zipakiye Kanyanga, izitegera mu kagari ka Rwankonjo, mu murenge wa Cyumba." Ibikurikiyeho

Nyarugenge: Batatu bafunzwe bakekwaho kwiba moto bakagurisha ibyuma byayo

Polisi y’u Rwanda mu karere ka Nyarugenge ku itariki ya 12 Nzeri yataye muri yombi abitwa Habiyambere Gatete Eric w’imyaka 25, Nzayisenga Edward w’imyaka 23 na Twagiramungu Abias w’imyaka 38 bakekwaho kwiba moto.

Umuvugizi wa Polisi mu Mujyi wa Kigali, Superintendent of Police (SP) Emmanuel Hitayezu yavuze ko aba bafatiwe mu kagari ka Nyabugogo umurenge wa Kigali. Ibikurikiyeho

Ubuyobozi bwa Karongi, Inzego z’umutekano, Ababyeyi n’Abarezi bafashe ingamba zo gukumira ugutwita kw’abangavu

Umuyobozi wungirije w’akarere ka Karongi ushinzwe imibereho myiza y’abaturage, Mukashema Drocella, Umuyobozi wa Polisi y’u Rwanda muri aka karere, Superintendent of Police (SP) Emmanuel Karuranga, Ababyeyi n’Abarezi b’abanyeshuri biga mu Ishuri ryisumbuye rya Ruganda riherereye mu kagari ka Rubona, mu murenge wa Ruganda, ku itariki 11 z’uku kwezi bunguranye ibitekerezo, banafatira hamwe ingamba zo gukumira inda ku bana b’abakobwa baryigamo.

Muri iri shuri, abana batatu b’abakobwa batewe inda muri uyu mwaka. Nyuma yo kubyara, babiri muri bo baretse ishuri; uwa gatatu (wiga mu mwaka wa gatandatu wisumbuye) arakiga. Ibikurikiyeho