Kinyarwanda
English
Ibihugu bihuriye mu muryango w’ abayobozi bakuru ba za Polisi mu bihugu byo burasirazuba bw’ Afurika (EAPCCO), byashyizeho uburyo bushya bwo kurwanya ubujura bw’ ibinyabiziga cyane cyane imodoka bwakundaga kugaragara muri ibi bihugu.
Ibi bikazakorwa hifashishijwe icyemezo kitwa Moto Vehicle Clearance Certificate (MVCC) kerekana ko ikinyabiziga atari ikibano, kikazajya cyerekanwa ku mupaka n’umushoferi ugiye kwinjira mu gihugu kiri muri uyu muryango ajya mu kindi. Iki cyemezo kikaba kizatangira gukoreshwa muri Werurwe umwaka utaha wa 2015.
Umuyobozi w’ishami rya rishinwe guhuza ibikorwa bya Polisi mpuzamahanga (Interpol) muri Polisi y’u Rwanda Assistant Commissioner of Police (ACP) Tony Kuramba, yasobanuye ko ibihugu byo mu karere byatangiye guhugura abakozi babyo, ku ikubitiro hakaba harahuguwe abakora mu nzego za Polisi, abakozi ba gasutamo n’ abakora mu kigo cy’abinjira n’abasohoka (Immigration). Aba bakozi bakaba bahugurwa ku mikoreshereze yiki cyemezo ndetse n’ uburyo bazakorana na bagenzi babo bo mu bindi bihugu hagamijwe gukomeza kurwanya ubujura bw’imodoka.
Ni muri urwo rwego abantu 7, baturutse muri izo nzego bari bamaze iminsi 2 bahabwa amahugurwa nk’aya yaberaga ku cyicaro gikuru cya Polisi y’ u Rwanda ku Kacyiru, aya mahugurwa akaba bayasojwe ku itariki ya 11 Ugushyingo 2014.
Asoza aya mahugurwa, ACP Kuramba yagize ati: “Iki cyemezo kizajya gitangirwa ku mipaka, urugero, nk’ igihe kizaba gitangiwe ku mupaka w’ u Rwanda, kizaba cyemerewe gukoreshwa muri ibyo bihugu bigize uyu muryango, ndetse ibi bikazorohereza umuntu wese uzaba yifuza kugurisha ikinyabiziga cye mu kindi gihugu, kuko kizaba cyerekana ko icyo kinyabiziga tari ikibano. Muri make, kugira ngo ubashe kugurisha ikinyabiziga muri ibi bihugu ni uko uzajya werekana iki cyemezo”.
Yakomeje asobanura ko iki cyemezo kizaba gikoranye ikoranabuhanga rihanitse, ku buryo bitazorohera uwashaka kukigana, anavuga ko kizatangwa n’isosiyete yo mu bwongereza yitwa De La Rue, inafite amashami hirya no hino ku isi.
Iyi sosiyete De La Rue, ni imwe mu masosiyete y’ubucuruzi akomeye ku isi, yazobereye mu gukora amafaranga n’ ibindi byemezo, ikaba isanzwe inakorana n’ibindi bihugu bitandukanye ndetse na banki zikomeye kubera icyizere ifitiwe.
Avuga ku bujura bw’ibinyabiziga mu Rwanda, ACP Kuramba yavuze ko mu Rwanda ubu bujura budakabije ndetse urebye impuzandengo wavuga ko nta buhari, ariko ko hakiri abantu biba imodoka mu bindi bihugu bakazicisha mu Rwanda aho baba bagiye kuzigurisha mu bihugu by’ abaturanyi nka Congo, uretse ko akenshi bafatwa.
Yasoje avuga ko ubu buryo bushya bwo kurwanya ubujura bw’imodoka, buje kunganira ubwari busanzweho cyane cyane nko guhanahana amakuru hagati y’ inzego za Polisi muri ibi bihugu.
Ibihugu bigize EAPCCO, ni 13 aribyo: Uganda, Burundi, Kenya, Tanzania, Rwanda, Seychelles, Sudan, Sudani y’Amajyepfo, Ethiopia, Eritrea, Djibouti, Ibirwa bya Comores na Somalia.
