Kinyarwanda
English
Polisi y’u Rwanda, ibinyujije mu ishami ryayo rishinzwe ubuvuzi, iri gukora igikorwa cyo gusuzuma ku buntu agakoko gatera SIDA bamwe mu bafatanyabikorwa bayo bo mu turere twa Huye na Nyanza.
Hakomeje gusuzumwa bamwe mu bagize urwego rushinzwe kunganira akarere mu mutekano (District Administration Security Support Organ-DASSO), inkeragutabara na bamwe mu bagize komite zo kwicungira umutekano (Community Policing Committees-CPCs) ndetse n’abapolisi bakorera muri utu turere.
Mu bindi bikomeje gukorwa, harimo gusiramura ku buntu bamwe muri abo bafatanyabikorwa.
Ibi bikorwa byabereye kuri zimwe muri za sitasiyo na posite bya Polisi. Bibanzirizwa buri gihe no kwigisha abagenerwabikorwa uko SIDA yandura, uko bayirinda no kuyirinda abandi , uburyo bwo gufasha abagize ibyago byo kwandura , n’umumaro wo kwipimisha no kwisiramuza.
Ibi bikorwa bigikomeje, byatangiye ku itariki 24 Gashyantare mu karere ka Huye naho mu ka Nyanza, byatangiye ku ya 25 Gashyantare.
Senior Supt. of Police (SSP), Emmanuel Nsabayezu, ukuriye ririya tsinda ry’abapolisi batanga izi serivisi yagize ati,"Kwipimisha ubwandu bw’agakoko gatera SIDA ni byiza kuko umuntu amenya uko ubuzima bwe buhagaze. Hari bamwe baba bakekeranya ko baba baranduye cyangwa ko baba ari bazima, ariko iyo wipimishije umenya ukuri bityo ugafata ingamba zo kwirinda no kurinda abandi kwandura agakoko gatera SIDA".
Ati,"Ubushakashatsi bwerekana ko kwisiramuza bigabanya ibyago byo kwandura agakoko gatera SIDA.Ni bumwe mu buryo bwo kwirinda ubwo bwandu ariko s’urukingo, ariko kubera ko bitanga amahirwe menshi yo kutandura, abantu bakwiye kubyitabira".
Yakanguriye abahawe izi serivisi kurushaho gufata ingamba zo kwirinda no kurinda abandi kwandura agakoko gatera SIDA n’indwara zandurira mu mibonanao mpuzabitsina no kubikangurira abandi.
Ku itariki 28 Gashyantare hazaba umukino w’umupira w’amaguru uzahuza abapolisi b’u Rwanda bakorera mu karere ka Huye n’urubyiruko rukora ibikorwa bitandukanye by’ubukorerabushake no gukumira ibyaha muri aka karere, ruzwi ku izina rya Rwanda Youth Volunteers in Crime Prevention(RYVCP).
Nyuma y’uwo mukino, hazatangwa ibiganiro ku kwirinda no kurwanya ibiyobyabwenge n’inzoga zitemewe mu Rwanda.
