Kinyarwanda
English
Kuwa 4 Werurwe 2018, Polisi y’u Rwanda ikorera mu karere ka Huye yagiranye inama na komite y’urubyiruko rw’abakorerabushake mu gukumira no kurwanya ibyaha bo ku rwego rw’akarere. Iyo nama yari igamije kurebera hamwe ibyagezweho no kwigira hamwe ibyavugururwa kugirango ibibazo bigaragara mu baturage bibashe gukemuka.
Umuyobozi wa Polisi mu karere ka Huye Superintendent of Police (SP) Justin G Rukara, yashimiye urubyiruko rw’abakorerabushake ku bwitange bagira mu gufatanya na Polisi, ababwira ko ibimaze gukorwa biri mu nzira nziza, abasaba kurushaho gushyiraho umwete.
SP Rukara yagize ati:’’Ndabashimira ku bwitange n’ubushake mukorana, mufatanya na Polisi mu gucunga umutekano. Hari byinshi byagiye bikemuka mubigizemo uruhare ndetse bimwe mu byashoboraga guhungabanya umutekano bikaburizwamo kubera ko mwatangiye amakuru ku gihe. Murasabwa kwirinda gusubira inyuma ahubwo mugakomeza gushyiraho umuhati kugirango turusheho gukaza umutekano muri aka karere.”
SP Rukara uru rubyiruko rw'abakorerabushake kubera ijisho Polisi, bamenya ibyahungabanya umutekano w’abaturage aho batuye kandi bakabimenyekanisha, ndetse ibibangamiye ubuzima bw’abaturage nk’isuku nke bagafasha abaturage kubikemura.
Yagize ati:’’ Muri imboni za Polisi y’u Rwanda kuko mugera aho itabasha kugera aho mutuye mu midugudu. Hakaba hari ibibazo byinshi bishobora guhungabanya umutekano mubasha kumenya mukabitumenyesha. Mukomeze gukurikirana ibibazo biri mu baturage, ibyo mushoboye mubikemure, ibirenze ubushobozi bwanyu mubigeze ku nzego zibishinzwe kugirango bikemurwe hakiri kare.”
Yakomeje ababwira ati:”Ni byiza ko mushyira imbaraga mu gufasha abaturage gukemura bimwe mu bibazo bibangamiye ubuzima bwabo nk’isuku nke, abatagira ubwiherero bujyanye n’igihe mukabubashakira, murushaho gufatanya nabo mu kuvugurura imibereho yabo cyane cyane mwifashishije umuganda wihariye mukora buri kwezi.”
SP Rukara yasoje abasaba gukomeza gufatanya hagati yabo no gukorera hamwe nk’ikipe, anabizeza ko Polisi y’u Rwanda ibari inyuma kandi ko itazahwema kubafasha mu bijyanye no kuzamura imibereho yabo.
Abagize Komite y’urubyiruko rw’abakorerabushake mu gukumira no kurwanya ibyaha y’akarere ka Huye nabo biyemeje kugeza ubutumwa bahawe kuri bagenzi babo baniyemeza kurushaho kwegera abaturage mu rwego rwo kumenya ibibazo bahura nabyo.
