Kinyarwanda
English
Abakirisitu n’Abayoboke b’Amadini atandukanye bo mu murenge wa Tumba, mu karere ka Huye, ku cyumweru tariki 29 Mata uyu mwaka bakoze igiterane kigamije gukangurira abahatuye kwirinda kwishora mu biyobyabwenge.
Icyo giterane cyabereye mu kagari ka Cyarwa; kikaba cyari gifite Insanganyamatsiko igira iti: "Twamagane ibiyobyabwenge; Yesu atugirire neza. Roho nzima mu mubiri muzima".
Abakitabiriye basengera muri Eglise Apostolique au Rwanda , AEBR (Association des Eglises Baptistes au Rwanda- Paruwase ya Butare), Kiliziya Gatulika - Paruwase ya Rango, El Shadai International Church, Eden Temple International Church, Eglise Vivante, Eglise Evangelique au Rwanda, Pentecost Revival Church n’Abayoboke ba Life Transformation Church.
Mu butumwa yagejeje ku bagera ku 3 000 bakitabiriye, Umuyobozi wa Polisi muri aka karere, Superintendent of Police (SP) Justin Rukara yabanje gushimira Abayoboke n’Abakirisitu b’aya Madini n’Amatorero ku bw’iki gikorwa cyo gukangurira abatuye Umurenge wa Cyarwa no mu nkengero zawo kwirinda ibiyobyabwenge bababwira ingaruka zo kubyishoramo.
Yagize ati,"Ibi bigaragaza ko musobanukiwe ko kurwanya ukwishora mu biyobyabwenge bisaba uruhare rwa buri wese, ndetse ko mwiyemeje gutanga umusanzu mu gukumira ibyaha byo kubitunda, kubicuruza, kubinywa no kubikoresha mukangurira ababikora kubireka."
Yababwiye ko gifatwa nk’ikiyobyabwenge mu Rwanda ikintu cyose gifite methanol irengeje igipimo cya zero n'ibice bitanu ku ijana (0.5%) mu bikigize; ikirengeje igipimo cya mirongo ine na gatanu ku ijana (45%) bya alukoro; ndetse n’ikinyobwa cyose cyateganywa nk’ikitemewe n’Amabwiriza ya Minisitiri ufite ubuzima mu nshingano ze nk’uko biteganywa n’Iteka rya Minisitiri w’Ubuzima Nº 20 /35 ryo ku wa 09/6/2015 rigena ibinyobwa bitemewe n'ibindi bintu bicungwa kandi bifatwa nk’ibiyobyabwenge n'urusobe rw'imiti ikoreshwa nka byo.
SP Rukara yabwiye abari aho ko ibiyobyabwenge bikunze gufatirwa muri aka karere (Huye) byiganjemo urumogi n’inzoga zitemewe mu Rwanda zivanwa muri bimwe mu bihugu bihana imbibi n’u Rwanda nka Kanyanga, Blue Sky, Chief Warari na Zebra Waragi; hamwe n’inzoga zitujuje ubuziranenge nka Muriture, Ibikwangari n’izindi.
Yakomoje ku ngaruka zo kwishora mu biyobyabwenge agira ati,"Umuntu ufashwe abinywa, abicuruza cyangwa abitunda arafungwa; kandi agacibwa ihazabu. Ikindi ni uko ibiyobyabwenge bigabanya ubushobozi bw’ubinywa; bwaba ubw’umubiri ndetse n’ubwo gutekereza ku buryo bigira ingaruka ku iterambere ry’ubyishoramo bikanadindiza iterambere ry’igihugu muri rusange. Buri wese aragirwa inama yo kubyirinda no gutungira Polisi agatoki ababyishoramo."
Yabwiye urubyiruko rwitabiriye icyo giterane ko kunywa ibiyobyabwenge bishobora gutuma bishora mu busambanyi bukurikirwa n’ingaruka zirimo gutwara inda, kureka ishuri, ipfunwe no kwandura zimwe mu ndwara zandurira mu mibonano mpuzabitsina; hanyuma arugira inama yo kubyirinda.
Mu ijambo rye, Umuyobozi w’Impuzamatorero n'Amadini mu murenge wa Tumba, Pasiteri Ahishakiye Joel yabwiye abitabiriye icyo giterane ati,"Dusanzwe twigisha Abayoboke n’Abakirisitu bacu kwirinda ibiyobyabwenge by’ubwoko bwose tubabwira ko ari icyaha . Kuba twahuje imbaraga tugategura igiterane nk’iki ni intambwe ikomeye mu gufatanya kurwanya ukwishora mu biyobyabwenge no gukumira ibyaha muri rusange."
Yakomeje agira ati,"Twemera; kandi tuzirikana ko Roho nzima igomba kuba mu mubiri muzima; kandi ko umuntu unywa urumogi cyangwa ibindi biyobyabwenge nta roho nzima n’umubiri muzima aba afite. Igiterane nk’iki kigamije gukangurira abatuye aka karere kwirinda ibiyobyabwenge n’ikindi cyose kinyuranyije n’amategeko."
Pasiteri Ahishakiye yasabye abitabiriye icyo gitaramo kugeza ubutumwa bahawe ku bagize imiryango yabo, inshuti n’abaturanyi babo.
