Kinyarwanda
English
Ikipe ya Polisi y’u Rwanda y’umukino w’intoki wa Handball (Police HC) yatangiye imikino yo kwishyura (Phase retour) yitwara neza ikomeza kuguma ku mwanya wa mbere wa Shampiyona n’amanota 30.
Mu gutangira imikino yo kwishyura, kuri uyu wa Gatandatu tariki ya 15 Kamena, ikipe ya Police HC yakinnye imikino ibiri, yayihuje n’amakipe abiri ari yo; ES Kigoma HC na UR Rukara, yose iyitwaramo neza itsinda izi kipe zombi, imikino yabereye mu Karere ka Ruhango.
Umukino wa mbere wayihuje na ES Kigoma, warangiye ku ntsinzi ya Police HC n’ibitego 44 kuri 24, umukino watangiye ushyushye ku mpande zombi ariko ikipe ya Police HC ikaza kugaragaza ko kuba iri ku mwanya wa mbere wa Shampiyona atari impanuka, ishyiramo ikinyuranyo cy’ibitego 20 byose.
Undi mukino wayihuje n’ikipe ya Kaminuza y’u Rwanda, Ishami rya Rukara (UR Rukara), nawo yawitwayemo neza ikomeza gushimangira umwanya wa mbere, iyitsinda ibitego 57 byose kuri 21.
Umutoza w’iyi kipe, CIP (rtd) Ntabanganyimana, yavuze ko intego ari ugukomeza kwitwara neza bakegukana iki gikombe.
Yagize ati: “Intego dufite nk’ikipe ni ukutagira amahirwe n’amwe dupfusha ubusa, dutakaza umukino n’umwe. Abakinnyi bameze neza, bafite ibyangombwa byose, icyo dusaba abafana ni ugukomeza kudushyigikira tubizeza ko tuzegukana iri rushanwa.”
Shampiyona y’uyu mwaka yitabiriwe n’amakipe 9 ari yo; Police HC itaratsindwa na rimwe, APR HC, Gicumbi HT, ES Kigoma, ADEGI Gituza, UR Huye, Gorillas HC, UR Rukara na Nyakabanda HC.
Ku munsi wa Kabiri w’imikino yo kwishyura iteganyijwe kuri iki cyumweru tariki ya 16 Kamena, ikipe ya Police HC nabwo ifite imikino ibiri iyihuza na Gicumbi HT na ADEGI Gituza mu Karere ka Gatsibo.
