POLISI Y'U RWANDA

Ikipe ya polisi y'umukino w'intoki yegukanye igikombe cya Carrée d'AS itsinze ikipe ya APR ku mukino wanyuma,  umukino warangiye ikipe ya Polisi itsinze ibitego  41 kuri 36 ya APR umukino waranzwe n'ishyaka ryinshi cyane ku ruhande rwa Polisi.

Uyu mukino wabaye nyuma yaho Polisi iserzereye Nyakabanda muri kimwe cya kabiri itsinze ibitego 35 kuri 18, naho APR isezerera ES Kigoma iyi tsinze ibitego 33 kuri 25.

Umukino abahungu b'ikipe ya Polisi bitwaye neza cyane aho barushije ikipe ya APR cyane mu gice cya mbere byanayifashije no kwitwara neza mu gice cya kabiri bituma irangiza umukino irusha APR ibitego 6.

Umukino warangiye Nkengurutse Alain atsinze ibitego 11 naho mugenzi we Tuyishime Bakary atsinda ibitego 9, Polisi kandi itsinze APR nyuma yuko baheruka kunganya ku mukino wanyuma wa shampiyona ibitego 31 kuri 31.

Nyuma y'umukino Polisi yashyikirijwe ibikombe bibiri harimo icya Carré d'AS yegukanye itsinze APR ndetse n'igikombe cya shampiyona iheruka kwegukana giherekejwe n'igihembo cy'ibihumbi magana abiri.

Kuwa 18 Ukwakira ikipe ya polisi izerekeza mu gihugu cya Burkina Faso aho izaba igiye kwitabira amarushanwa y'igikombe cya Afurika,  aha umutoza Sgt Udahemuka Alphonse yatangaje ko bajyanye intego yo gutsinda.

Sgt Udahemuka yagize ati" umwaka ushize ntago twitwaye neza muri aya marushanwa kuko twavuyeyo nta kipe nimwe dutsinze,  uyu mwaka rero turifuza byibura gutsinda ikipe kugira dukureho icyuho cy'umwaka ushize"

Sgt Udahemuka Alphonse yongeyeho ko intego nyamukuru ari ukugaragaza isura y'umukino w'intoki mu mahanga avuga ko bazakora iyo bwabaga bakitwara neza hanze kuko mu Rwanda na Afurika y'iburasirazuba ho bamaze kubaka izina.

Uyu mukino wa nyuma wa Carrée d'AS witabiriwe kandi n'abayobozi ba Polisi barimo Com Emmanuel Butera, ACP Yahaya Kamunuga,  ACP Jean Nepomuscene Mbonyumuvunyi bari baje gushyigikira iyi kipe ya Polisi y'umukino w'intoki.