Kinyarwanda
English
Mu turere twa Burera na Rulindo, ku wa gatandatu tariki 12 Gicurasi uyu mwaka habereye ubukagurambaga ku kwirinda kwishora mu biyobyabwenge bwakozwe na Polisi ifatanyije n’izindi nzego; ibi bikaba byarabanjirijwe no kumena litiro zisaga 3 000 z’inzoga zitujuje ubuziranenge n’amaduzeni arenga 700 y’iz’itemewe mu Rwanda z’amoko atandukanye.
Muri Rulindo hamenwe litiro 1 500 z’iyitwa Muriture zafatanywe uwitwa Nzamurambaho Viateur na litiro 500 z’inzoga yitwa Igishyushye zafatanywe Nzeyimana Girbert; izi nzoga zikaba zarafatiwe mu ngo z’aba bombi batuye mu kagari ka Mugote, mu murenge wa Murambi.
Mu karere ka Burera, mu mirenge ya Kivuye na Bungwe Polisi yahafatiye litiro 1 153 za Kanyanga n’amaduzeni 742 y’inzoga zo mu masashe zigizwe na Chief Warage, Blue Sky, Chase Vodka, Kick Warage na Zebra Warage. Abafatanywe izi nzoga zivanwa muri bimwe mu bihugu bihana imbibi n’u Rwanda baciwe amande; hanyuma ziramenwa; abatuye iyi mirenge bitabiriye ibyo bikorwa bakangurirwa kwirinda kwishora mu biyobyabwenge.
Mu butumwa yagejeje ku bitabiriye igikorwa cyo kumena inzoga zafatanywe Nzamurambaho na zeyimana, Umuyobozi w’agateganyo wa Polisi mu karere ka Rulindo, Chief Inspector of Police (CIP) Laurent Rafiki yababwiye ati,"Igikorwa cy’uyu munsi ni igihamya ko gushora amafaranga mu binyobwa nk’ibi bitujuje ubuziranenge ari ukuyapfusha ubusa nyamara yakabaye ashorwa mu bindi byemewe n’amategeko bibyara inyungu; kandi bitagira ingaruka ku buzima bw’ababinywa."
Yagize kandi ati, "Gukubita no gukomeretsa, gufata ku ngufu , ihohotera rishingiye ku gitsina n’ibindi byaha bifitanye isano na byo bikorwa ahanini n’abanywa inzoga nk’izi; ibikorwa byabo bikaba bibangamira abandi; baha abo babana, abaturanyi babo, ndetse n’abo bahura iyo bagenda mu nzira. Abari aha muragirwa inama yo kwirinda kuzenga no kuzicuruza; kandi mugire uruhare mu kubirwanya mutanga amakuru yerekeye ababikora."
Yababwiye kandi ati,"Nimwirinda izi nzoga zitujuje ubuziranenge muzagira amagara mazima mugire imbaraga zo gukora ibibateza imbere binateza imbere igihugu muri rusange; kandi mwirinde ibyaha biterwa no kuzinywa."
CIP Rafiki yashimye abatanze amakuru yatumye Polisi ifata izo nzoga; asaba abari aho kwirinda ibyaha aho biva bikagera no gutangira ku gihe amakuru yerekeranye n’ikintu cyose bakeka ko gishobora guhungabanya umutekano kugira ngo gikumirwe.
Ubu butumwa bwerekeranye no kwirinda kwishora mu biyobyabwenge ni bwo Umuyobozi wa Sitasiyo ya Polisi ya Kivuye yagejeje ku batuye uyu murenge bitabiriye igikorwa cyabaye uwo munsi (ku wa gatandatu) cyo kumena inzoga zahafatiwe.
