POLISI Y'U RWANDA

Kuri uyu wa mbere taliki ya 28 Nzeli 2015, ku cyicaro gikuru cya Polisi y’u Rwanda, habaye inama yahuje Polisi y’u Rwanda , abashinzwe umutekano mu mabanki atandukanye hamwe n’abahagarariye amakompanyi  atwara amafaranga muri aya mabanki ikaba yari igamije kwigira hamwe uburyo bwo gutwara amafaranga n’imodoka hanubahirizwa amategeko y’umuhanda. Ibi ni bimwe mu bikorwa bya Polisi y’u Rwanda by’ukwezi yahariye gukangurira abakoresha umuhanda kubahiriza amategeko n’amabwiriza bigenga kuwugendamo no kuwutwaramo ibinyabiziga bwatangiye ku italiki 7 Nzeli.

Ni inama yari iyobowe n’umuyobozi w’ishami rishinzwe umutekano wo mu muhanda muri Polisi y’u Rwanda, Comissionner of Police(CP) George Rumanzi, yari yitabiriwe kandi n’ushinzwe amakompanyi yigenga ashinzwe umutekano muri Polisi y’u Rwanda, Assistant Comissionner of Police (ACP) Denis Basabose.

Mu ijambo rye, CP George Rumanzi yabwiye abashinzwe umutekano mu mabanki n’abahagarariye kompanyi  zigenga z’umutekano ko igikorwa bahuriyeho cyo gutwara amafaranga ya za banki, gikwiye gukorwa mu buryo butagira uwo bubangamira, aha yagize ati:” Gutwara amafaranga uyajyana aha n’aha, ntaho bihuriye  no gutwara ibinyabiziga nabi kuko bihungabanya umutekano w’abo musangiye umuhanda tutaretse n’ubuzima bw’ubitwaye buba buri mu kaga.”

Yasabye abitabiriye inama gufatanya na Polisi urwo rugamba rwo gukangurira abashoferi n’abayobozi babo muri ibi bikorwa byo gutwara amafaranga ko babakangurira kumva ko nabo bagengwa n’amategeko agenga abandi bashoferi , aho yaboneyeho kubemerera ubufasha bwose bazakenera ku ishami abereye umuyobozi, haba mu guha akazi abashoferi bashya ndetse no guhugura abo bafite, ko bazabubona.

CP Rumanzi  yakomeje agira ati:” Nta kibazo cy’umutekano mucye igihugu cyacu gifite, nta mpamvu rero ihari yo kwica amategeko y’umuhanda witwaje umutekano w’amafaranga utwaye mu modoka, niyo mpamvu abazagaragaraho iyi myitwarire bazabihanirwa kuko ntawe uri hejuru y’amategeko.”

CP Rumanzi yarangije yibutsa n’abatwara ibinyabiziga biri mu bukwe n’imihango yo gushyingura uwitabye Imana ko bagengwa n’amategeko agenga ibindi binyabiziga.

Bwana Kashemeza Robert, umuyobozi w’ishyirahamwe ry’amakompanyi yigenga ashinzwe umutekano, mu ijambo rye, yavuze ko we n’abo ahagarariye bagiye gukomeza gukangurira cyane cyane abashoferi batwara izi modoka ko, bakwiye kwita ku buzima bwabo mbere yo gushyira ubwabo mu kaga, akaba yanasabye Polisi ko yazajya ihana abica amategeko y’umuhanda bitwaje gutwara amafaranga kuko ntabyo baba batumwe.

Sibomana Gervais, ushinzwe umutekano muri Bank of Kigali, yavuze ko yishimiye ibyavugiwe muri iyi nama kuko bahakuye amakuru bamwe batari bazi, ko ariko bibukijwe ko mu byo bashinzwe harimo n’ubuzima bw’abatwara ziriya modoka ndetse n’abari mu muhanda muri rusange, bityo bagiye gukaza inyigisho babageneraga .

Mu rwego rwo gukomeza kwigisha kandi ibice by’abanyarwanda bose, Polisi y’u Rwanda mu turere twa  Ngororero na Bugesera, ku itariki 28 Nzeri 2015 yigishije amategeko yo kugenda mu muhanda abanyeshuri bagera ku 2000 b’ibigo bibiri byo muri utu turere twombi, ibi bikaba byari bigamije kugira ngo birinde gukora cyangwa guteza impanuka mu muhanda.

Mu karere ka Ngororero, higishijwe abanyeshuri barenga igihumbi bo mu rwunge rw’amashuri rwa Hindiro, mu murenge wa Hindiro bigishijwe na AIP Alexandre Minani mu gihe mu karere ka Bugesera, abanyeshuri 900 b’ishuri ribanza rya Kagasa, mu murenge wa Gashora bigishijwe na AIP Janvier Renzaho ushinzwe umutekano wo mu muhanda muri Polisi ikorera muri Bugesera.

Aha hombi, abanyeshuri bigishijwe kujya buri gihe banyura  ku ruhande rw’ibumoso bw’umuhanda bakurikije icyerekezo bajyamo  kandi bakanyura buri gihe mu nzira yateganyirijwe abanyamaguru mu gihe ihari.

Babwiwe kujya babanza kureba iburyo n’ibumoso by’umuhanda  niba nta modoka iri hafi ku buryo yambutse batahurira nayo hagati mu muhanda ku buryo byateza impanuka.

 AIP Renzaho kandi yagiranye inama n’abamotari bo mu isantere y’ubucuruzi ya Ramiro, mu murenge wa Gashora bagera kuri 50 n’abanyonzi 150 bakorera mu murenge wa Mayange, maze ibibutsa kubahiriza amategeko n’amabwiriza bigenga umwuga wabo.