Kinyarwanda
English
Kuri uyu wa Gatandatu tariki ya 01 Kamena 2024 ikipe ya Police HC igeze ku mukino wa nyuma mu irushanwa ryo kwibuka Jenoside yakorewe abatutsi mu 1994. Ihageze nyuma yo gutsinda amakipe nka UR-Rukara, UR-Huye na Gicumbi HT bahuriye muri kimwe cya kabiri cy'iri rushanwa.
Police HC itsinze Gicumbi HT ibitego 38 kuri 24. Nyuma y'uyu mukino umutoza wa Police HC CIP (Rtd) Antoine Ntabanganyimana yashimiye abakinnyi be uko bitwaye.
Ati" Uyu munsi twagize imikino myinshi kandi ikomeye. Twakinnye na UR-Rukara ndetse na UR-Huye, nyuma yo gutsinda izi kipe twabonye itike yo gukina umukino wa 1/2 cy'irangiza none nawo turawutsinze tugeze ku mukino wa nyuma."
CIP (Rtd) Ntabanganyimana yashimiye ubuyobozi bwa Polisi y'u Rwanda ndetse n'abafana uburyo bakomeje kuba hafi y'ikipe yabo. Yabijeje kuzegukana iri rushanwa nk'uko yabikoze umwaka ushize.
Mu mukino wa nyuma uzaba kuri iki cyumweru tariki ya 02 Kamena Police HC izakina na APR HC. Kuri uyu wa Gatanu tariki ya 31 Kamena 2024 ubwo hatangizwaga iri rushanwa ryo kwibuka ku nshuro ya 30 Jenoside yakorewe abatutsi, Police HC yakinnye na Prisons HC yo mu gihugu cya Uganda iyitsinda ibitego 33 kuri 24.
Mu karere ka Kirehe kuri uyu wa Gatandatu tariki ya 01 Kamena naho hatangiriye amarushanwa yo kwibuka ku nshuro ya 30 Jenoside yakorewe abatutsi . Abakinnyi ba Polisi y'u Rwanda mu mukino njyarugamba wa Taekwondo mu cyiciro cy'abagabo bari munsi y'ibiro 74, PC Tuyisingize Jean Damascene na Nizeyimana Savio bageze ku mukino wa nyuma. Abari munsi y'ibiro 80 PC Sibomana Deal nawe yageze ku mukino wa nyuma. Mu bafite ibiro biri hejuru ya 80 SGT Nkotanyi Richard na PC Ngaboyimanzi Donatien bageze ku mukino wa nyuma.
Ni mugihe mu bakobwa bari munsi y'ibiro 53 Uwase Francine wa Police Taekwondo ageze ku mukino wa nyuma, mu bari hejuru y'ibiro 67 PC Isingizwe Betty ageze ku mukino wa nyuma. Abari munsi y'ibiro 57 Uwababyeyi Delphine yageze ku mukino wa nyuma ni mu gihe mu bafite ibiro biri munsi ya 62 PC Ndacyayisenga Aline ageze ku mukino wa nyuma.
