Kinyarwanda
English
Ikipe ya Polisi y’u Rwanda mu mukino njyarugamba wa Taekwondo yitwaye neza mu irushanwa ryo Kwibuka Jenoside (Genocide Memorial Tournament-GMT 2025), yegukana igikombe n’imidali 11, irimo 7 ya zahabu n’ine y’umuringa.
Iri rushanwa ryabereye mu Kigo cy’amashuri cya Highland giherereye i Nyamata, mu Karere ka Bugesera mu gihe cy’iminsi ibiri; ku wa Gatandatu tariki ya 28 no ku Cyumweru tariki ya 29 Kamena, ryateguwe mu rwego rwo kwibuka ku nshuro ya 31 Jenoside yakorewe Abatutsi mu 1994 (Kwibuka31), hazirikanwa abakinnyi n’abafana bavukijwe ubuzima bazira uko bavutse.
Imikino yatangijwe n’urugendo rwo kwibuka, aho abitabiriye irushanwa berekeje ku rwibutso rwa Nyamata, bashyira indabo ku mva, banasobanurirwa amateka yaranze itegurwa n’ishyirwa mu bikorwa rya Jenoside yakorewe Abatutsi.
Ryahuje amakipe 13, agizwe na 11 yo mu Rwanda; Police Taekwondo Club, Dream fighters, Dream club, Pionner, Bugesera, IYF, Best choice team, Kirehe team, Wisdom team, Mount hope team na Unit team, ndetse n’amakipe abiri yo hanze ariyo; Uganda Police yo muri Uganda na Tharaka University yo muri Kenya.
Police Taekwondo Club niyo yahize andi makipe zari zihanganye, iza ku mwanya wa mbere yegukana igikombe, imidali 7 ya zahabu n’imidali 4 y'umuringa, mu gihe ikipe ya Dream Taekwondo Club yaje ku mwanya wa kabiri, Dream Fighters Taekwondo Club iza ku mwanya wa gatatu.
