Kinyarwanda
English
Umuyobozi Mukuru wa Polisi y’u Rwanda wungirije ushinzwe Ubuyobozi n’Abakozi, DIGP Juvenal Marizamunda, ku wa gatanu tariki 22 Kamena uyu mwaka yasoje amahugurwa ajyanye no kugarura amahoro no kubungabunga umutekano yaberaga mu Ishuri rya Polisi y’u Rwanda riri i Gishari, mu karere ka Rwamagana rizwi nka Police Training School (PTS).
Aya mahugurwa yatangiye ku itariki 11 z’uku kwezi. Yitabiriwe n’Abapolisi barenga 50 baturuka mu bihugu byo muri aka karere ka Afurika y’Iburasirazuba bagize Umutwe ushinzwe gutabara aho rukomeye uzwi mu rurimi rw’Icyongereza nka East African Standby Force (EASF).
Ni ku nshuro ya gatandatu amahugurwa nk’aya abereye mu Rwanda. Abayitabiriye baturuka mu Rwanda, Uganda, Kenya, Ethiopia, Sudan, Somalia, Ibirwa bya Seychelles n’Ibirwa bya Comores.
Abahuguwe bahawe ubumenyi ku bintu bitandukanye; muri byo harimo: Uburenganzira bw’Ikiremwamuntu, kurinda Abasivile, Uburenganzira bw’Abagore, kugarura amahoro no kubungabunga umutekano, Imishyikirano n’Ubuhuza , inshingano za EASF, imirimo ikorwa mu butumwa bw’amahoro n’imyitwarire ikwiye kuranga ababwohorejwemo, imbogamizi bahura na zo, n’uburyo bazikemura .
Ubwo yayasozaga ku mugaragaro, DIGP Marizamunda yabanje gushima abayitabiriye kubera ko bakurikiye neza amasomo; ababwira ko amahugurwa nk’aya ari ingenzi kubera ko yongerera ubumenyi abitegura kujya mu butumwa bw’amahoro; kandi ko iyo barimo guhugurwa baboneraho gusangira ubunararibonye mu kubungabunga umutekano.
DIGP Marizamunda yabwiye abayakurikiye ko Afurika yiyemeje gushaka ibisubizo by’ibibazo biyugarije; akaba ari muri urwo rwego Umuryango wa Afurika Yunze Ubumwe washyizeho umutwe uhora witeguye gutabara aho rukomeye uzwi nka African Standby Force (ASF); akarere ka Afurika y’Iburasirazuba kakaba na ko karashyizeho umutwe nk’uyu ushinzwe gutabara aho rukomeye mu bihugu bikagize (EASF).
Yavuze ko kuba U Rwanda rwakira amahugurwa nk’aya, ari ikimemenyetso ko ruha agaciro ibyerekeranye no kubungabunga amahoro; rukaba kandi rufatanya n’ibindi bihugu mu gushakira umuti urambye amakimbirane n’ibibazo bitandukanye uyu mugabane ufite cyangwa uhura na byo.
DIGP Marizamunda yagize ati, "Gutabara aho rukomeye ukabasha gukemura ikibazo cyavutse ahantu runaka bisaba ubumenyi buhagije. Ndahamya ndashidikanya ko ubumenyi mwungukiye muri aya masomo buzatuma musohoza neza inshingano zanyu."
Yabwiye abasoje amahugurwa ko kurwanya no gukumira ibyaha ndengamipaka bisaba ubufatanye bushingiye ahanini ku guhanahana amakuru ku gihe.
Uwari uhagarariye EASF mu isoza ry’aya mahugurwa, ACP Dinah Kyasimire yavuze ko amahugurwa abajya mu butumwa bw’amahoro bahabwa atuma bamenya neza imiterere n’ibibazo bashobora guhura na byo; bityo bakamenya uko bagomba kwitwara n’uburyo babikemura.
Yijeje ko EASF izakomeza guhugura abajya mu butumwa bw’amahoro; baba abajya ku Mugabane wa Afurika ndetse n’abajya ahandi ku isi.
ACP Kyasimire yashimye U Rwanda ku nkunga yarwo mu kwakira no gutuma amahugurwa nk’aya agenda neza.
Mu ijambo rye, umwe mu bakurikiye aya mahugurwa, Sgt Robin Alex, uturuka mu Birwa bya Seychelles yagize ati,"Twigishijwe n’impuguke zizi neza ibijyanye n’ubutumwa bw’amahoro; kandi twungutse byinshi . Kuba aya mahugurwa yaragenze neza byatewe nuko yateguwe neza."
Yagize kandi ati,"Mu izina rya bagenzi banjye basoje amahugurwa, turashima Guverinoma y’u Rwanda na Polisi y’u Rwanda ku buryo by’umwihariko, Ubuyobozi bwa PTS n’ Abaduhuguye ku bumenyi twaherewe muri iri Shuri. Twijeje ko tuzashyira mu bikorwa ibyo twigishijwe; bityo dukomeze gufatanya kubungabunga umutekano muri aka karere, ndetse n’ahandi tuziyambazwa."
