POLISI Y'U RWANDA

Abapolisi 296 bo ku rwego rwa ba su-ofisiye (NCOs) kuri uyu wa Gatanu tariki ya 18 Nzeri, basoje amahugurwa bari bamazemo ibyumweru 18 mu Ishuri ry’amahugurwa rya Polisi (PTS) riherereye i Gishari mu Karere ka Rwamagana.

Ni amahugurwa agize icyiciro cya 16 yitabiriwe n’abapolisi bato bakorera mu mashami atandukanye ya Polisi y’u Rwanda, mu rwego rwo kubongerera ubumenyi n’ubushobozi mu bijyanye no gucunga umutekano n’ituze rusange, iby’ibanze mu kuzuza inshingano mu kazi gakorerwa ku masitasiyo n’ahandi, imyitwarire ya kinyamwuga n’ibindi bitandukanye.

Usibye amasomo baherewe mu ishuri, aba bapolisi banakoze urugendoshuri basura ahantu hatandukanye harimo Urwibutso rwa Jenoside rwa Kigali ku Gisozi, Ingoro y’Amateka y’urugamba rwo guhagarika Jenoside ndetse banasuye Ingoro ndangamurage yo ku Mulindi w'Intwali. Ibi bikaba byarakozwe mu rwego rwo kubafasha gusobanukirwa byisumbuye amateka yaranze igihugu.

Mu muhango wo gusoza aya mahugurwa, Umuyobozi Mukuru wungirije wa Polisi y'u Rwanda (DIGP) ushinzwe ibikorwa, CP Vincent Sano, yashimiye abarangije amasomo imbaraga, ubwitange, ubushake, gukorera hamwe na disipuline ndetse n’umurava byabaranze byose bigamije gukomeza guteza imbere ubunyamwuga bwabo.

Yagize ati: “Mwebwe abapolisi bato mufite inshingano zitandukanye zikomeye mu myanya muba murimo ku rwego rwanyu hirya no hino aho mukorera, aya masomo muba mumazemo igihe tuyafata nk’umusemburo kuri bagenzi banyu n’abo munshinzwe kuko muba mugiye gusubira aho mukorera mukabasangayo mukababera urugero rwiza.”

Yasabye abarangije amahugurwa gushyira mu bikorwa ubumenyi n’ubushobozi bungukiye mu masomo, kugira ngo barusheho kunoza imikorere mu mashami atandukanye y’aho bakorera. 

Ati: “Ntimukemere ko ubumenyi mwungukiye hano buguma mu nyigisho gusa. Mubuhindure imikorere myiza kandi inoze. Dutekereza ko muzabugaragariza mu bikorwa ndetse mwaba murimo kubugaragaza bigafasha n’abandi batari baza kwiga aya masomo mwize kugira ngo bakurikire urugero rwiza mubaha rw’umwuga wa Polisi ku rwego rwanyu.”

CP Sano yakomeje kubashishikariza gukomeza kwiga no gufasha mu guteza imbere ubunyamwuga bw’abakozi bashinzwe.

Yagize ati: “Kuba murangije aya mahugurwa ntibigomba gufatwa nk’iherezo ry’iterambere mu mwuga wanyu, ahubwo ni indi ntambwe y’ingenzi mu rugendo rw’umwuga wanyu. Ndabakangurira gukomeza kwiga igihe cyose muzaba muri mu kazi, aho muzaba muri mujye mukomeza mwihugure muri izi nyigisho babahaye ndetse n’izo batabahaye musoma ibitabo n’ahandi mwakwiyungura ubumenyi kuko bizabafasha gusohoza inshingano zanyu za Polisi mudategwa.” 

Umuyobozi w’Ishuri rya Polisi ry’amahugurwa, Commissioners of Police (CP) Rafiki Mujiji, yavuze ko mu gihe cy’ibyumweru 18 bamaze bahugurwa, bize amasomo atandukanye azabafasha kuzuza neza inshingano zabo.

Muri ayo masomo harimo; ibikorwa bya Polisi, ubumenyi ku mikoreshereze y’imbunda, guhosha imyigaragambyo no gucunga ituze muri rubanda, amwe mu masomo ya gisirikare, ibikorwa byo gucunga umutekano imbere mu gihugu, akarasisi, indangagaciro za Polisi, ikoresha ry’imbaraga n’imbunda mu kazi ka Polisi, imikoranire n’itangazamakuru, imikoranire ya Polisi n’abaturage, uburere mboneragihugu n’andi atandukanye azabafasha mu kazi kabo ka buri munsi.  

CP Mujiji yashimiye abanyeshuri umurava n‘ubushake bagaragaje, avuga ko bizera badashidikanya ko ibyo bize bizabafasha kuzuza neza inshingano bazahabwa nyuma yo gusoza amahugurwa.