Guhura abantu bakaganira bituma hari ubumenyi bungukira hamwe kuko buri wese azana igitekerezo ke n’undi icye byakusanirizwa hamwe bikabyazwa umusaruro. Ikindi iyo abantu bahuriye hamwe bakemura ibibazo bitandukanye,bagafata n’ingamba nshya zo kwiteza imbere no kuzamura imibereho yabo muri rusange.

Bumwe mu buryo bahuriramo bwo kungurana ibitekerezo ni Inteko z’abaturage hirya no hino mu gihugu; aho abaturage bo mu mudugudu runaka basurwa n’inzego zitandukanye zikabafasha kwikemurira ibibazo.

Ku italiki ya 07 Kanama uyu mwaka, mu mirenge yose igize aka karere ka Gisagara habereye inteko z’abaturage.

Mu murenge wa Nyanza,akagari ka Nyaruteja, mu mudugudu wa Manyoni, hateraniye Inteko y’abaturage aho bemereye ubuyobozi bw’akarere n’umurenge ndetse n’inzego zishinzwe umutekano muri ako karere, gukaza umutekano barwanya icyo cyose cyahungabanya umutekano wabo.

Ushinzwe imikoranire myiza no guhuza ibikorwa bya Polisi n’izindi nzego ndetse  n’abaturage mu karere ka Gisagara Assistant Inspector of Police (AIP) Innocent Nshimiyimana, aganira n’aba baturage yabasobanuriye akamaro k’umutekano mu mibereho yabo ya buri munsi.

Yagize ati”Umutekano uraharanirwa kandi buri wese aba yifuza kuwugira. Umutekano rero  buri muntu akwiye kuwuharanira we ubwe akawugeza no ku bandi, kandi akarinda ikintu cyose cyaza kigamije kuwuhungabanya”.

Yakomeje ababwira ko bakwiye kurwanya ibyaha bitandukanye bishobora guhungabanya umutekano wabo cyane cyane ibiyobyabwenge kuko usanga biza ku isonga mu kuwuhungabanya.

Yaravuze ati” Nkuko byitwa ko ari ibiyobyabwenge,uwabinyoye biramuyobya. Bityo, bigakurura intonganya mu muryango, ihohoterwa rishingiye ku gitsina, gufata ku ngufu abagore n’abakobwa n’ibindi. Ikindi kandi, ibiyobyabwenge bitera n’ubukene mu miryango ndetse n’uburwayi ku babinywa.”

AIP Nshimiyimana yabasabye kujya batanga amakuru ku kintu icyo aricyo cyose babonye gishobora guhungabanya umutekano no kujya bagira amakayi bandikamo abinjiye n’abasohotse, kuko bituma bamenya hakiri kare umunyabyaha cyangwa undi wese wabahungabanyiriza umutekano.

Umuyobozi w’akarere ka Gisagara Rutaburingoga Jerome, mu ijambo rye, we yashimiye aba baturage uburyo bahura bakarebera hamwe ibyifuzo n’ibibazo bafite bakabikemurira hamwe.

Yagize ati” Nibyiza guhura nk’uku kuko mwungurana inama nyinshi. Murasabwa kujya mwitabira gahunda za leta mukanazubahiriza, mugakora amarondo uko bikwiye, ikindi mukarushaho gukorera hamwe kuko bizabafasha kugera kuri byinshi”.

Abaturage yo kumva ubu butumwa, abaturage, biyemeje kurushaho kwicungira umutekano, biyemeza ko bagiye kurwanya ibiyobyabwenge n’ibindi byaha.