Kinyarwanda
English
Mu nama mpuzabikorwa y’akarere ka Gicumbi yateranye kuwa mbere tariki ya 12 Gicurasi, umuyobozi w’intara y’amajyaruguru Bosenibamwe Aimé yasabye abayitabiriye gushyira hamwe imbaraga, bakarwanya ibiyobyabwenge bigaragara mu karere kabo kuko bihungabanya umutekano.
Iyi nama yabereye mu kagari ka Nyarutarama umurenge wa Byumba, yari yitabiriwe n’abantu barenga 900, barimo abayobozi b’imidugudu, abahuzabikorwa b’utugari, ab’imirenge, nyobozi na njyanama y’akarere ka Gicumbi, abahagarariye amadini, abahagarariye abikorera kugiti cyabo ndetse n’inzego z’umutekano.
Muri iyi nama, aba bayobozi baganiriye ku kibazo cy’ikoreshwa ry’ibiyobyabwenge mu karere, uko ihohoterwa rishingiye ku gitsina rihagaze muri Gicumbi ndetse no kurwanya ubujura.
Aba bayobozi babwiwe ko muri rusange ibyaha bigenda bigabanuka, abaturage batuye mu mujyi wa Gicumbi basabwa gushyira amatara ku ngo zabo ngo hirindwe ubujura, banemeranywa ko bose hamwe bagiye gushyira hamwe imbaraga bakarwanya abiyita “Abarembetsi” binjiza bakanacuruza ikiyobyabwenge cya Kanyanga, bagikuye mu bihugu duhana imbibe.
Guverineri Bosenibamwe yasabye abari bitabiriye inama ko bagomba gufatanya bakarwanya aba bantu biyita Abarembetsi bazana bakanacuruza kanyanga, kuko iza ku isonga mu bihungabanya umutekano mu karere ka Gicumbi by’umwihariko no mu ntara y’amajyarugu muri rusange.
Kuri iki kibazo, Guverineri Bosenibamwe yasabye abayobozi b’imidugudu ko kugeza mu kwezi kwa Kamena, baba barangije gukora urutonde rw’abantu bose banywa bacuruza cyangwa abinjiza kanyanga ku mitwe cyangwa abazitunda bakoresheje za moto bose bagahanwa.
Umuyobozi wa Polisi mu Karere ka Gicumbi Senior Superitendent of Police (SSP) Felix Bizimana, yabwiye abitabiriye iyi nama ko Polisi y’u Rwanda yahagurukiye kurwanya abiyita abarembetsi, ndetse ubu abasaga 100 bakaba bamaze gufatwa, abandi 45 bafashwe banywa kanyanga bakaba bari mu kigo ngororamuco cya Rutare.
SSP Bizimana yasabye abayobozi b’inzego z’ibanze n’abaturage gukomeza gufatanya na Polisi bagatanga amakuru y’aho bazi aba baremetsi, kandi nabo bakirinda kunywa ibiyobyabwenge kuko byangiza ubuzima bikanateza umutekano mucye.
