POLISI Y'U RWANDA

Mu karere ka Gicumbi, ku wa kane tariki 7 Kamena uyu mwaka habereye igikorwa cyo kumena inzoga zitemewe mu Rwanda zahafatiwe mu mezi abiri ashize; abakitabiriye bakangurirwa kwirinda kubyishoramo.

Hamenwe 2 170 za Kanyanga, amasashi 14 556 ya Zebra Waragi, amasashi 9 092 ya Chief Waragi, amasashi 6 672 ya Kick Waragi, amasashi 1 275 ya African Gin, amasashi 1 020 ya Chase Vodka, amasashi 864 ya Masha Bora, amasashi 240 ya Cheers, amasashi 168 ya Choice Waragi, amasashi 156 ya Chance, udupfunyika 152 twa Mayirungi, amasashi 103 ya Leaving Gin, amasashi 24 ya Hero Waragi, amacupa 18 ya Kambuca, amacupa 8 ya Primos Vodka, n’amacupa 2 ya Kazire.

Kanyanga, Chief Waragi na Mayirungi (bikaba ari bimwe mu byamenwe) bifatwa nk’Ibiyobyabwenge mu Rwanda nk’uko biteganywa n’Iteka rya Minisitiri w’Ubuzima Nº 20/35 ryo ku wa 09/6/2015 rigena ibinyobwa bitemewe n'ibindi bintu bicungwa kandi bifatwa nk’ibiyobyabwenge n'urusobe rw'imiti ikoreshwa nka byo.

Ibindi bifatwa nka byo; nk’uko iri Teka ribiteganya harimo Urumogi na Suzie. Iri Teka rivuga  kandi ko guhumeka Kole na Lisansi na byo bifatwa nk’Ibiyobyabwenge.

Mu butumwa yagejeje ku bitabiriye igikorwa cyo kumena izi nzoga cyabereye mu kagari ka Rwankonjo, mu murenge wa Cyumba, Umuyobozi w’agateganyo w’Akarere ka Gicumbi, Kamili Athanase yababwiye ati,"Igikorwa cy’uyu munsi ni igihamya ko gushora amafaranga muri izi nzoga zitemewe mu Rwanda ari ukuyapfusha ubusa nyamara yakabaye ashorwa mu bindi byemewe n’amategeko bibyara inyungu; kandi bitagira ingaruka mbi ku buzima bw’ababinywa."

Yasabye abari aho kwirinda kwishora mu biyobyabwenge, kandi bakagira uruhare mu kurwanya icuruzwa, inyobwa n’ikoreshwa ryabyo batungira Polisi agatoki ababikora; ndetse abakangurira gukora neza amarondo kugira ngo bakumire ibyaha muri rusange.

Aganira n’abatuye aho icyo gikorwa cyo kumena izo nzoga cyabereye, Umuyobozi wa Polisi mu karere ka Gicumbi, Superintendent of Police (SP) Gaston Karagire yagize ati, "Abishora mu biyobyabwenge; ni ukuvuga; ababyinjiza mu gihugu, ababitunda, ababicuruza n’ababikoresha ntibatuye bonyine. Bamwe mu babikora ni abavandimwe banyu; abandi ni inshuti n’abaturanyi banyu."

Yakomeje agira ati, "Abigira ntibindeba ntibatange amakuru yerekeranye n’abishora mu biyobyabwenge bamenye ko bazagerwaho n’ingaruka zabyo zirimo kuba ababinyoye bashobora kubakubita ku buryo banabakomeretsa; ababinywa bakaba kandi bakora ibindi byaha birimo gufata ku ngufu, ihohotera rishingiye ku gitsina no gusambanya abana. Murasabwa kwirinda ibiyobyabwenge aho biva bikagera."

SP Karagire yashimye abatanze amakuru yatumye Polisi ifata izo nzoga; asaba abari aho kwirinda ibyaha aho biva bikagera no gutangira ku gihe amakuru yerekeranye n’ikintu cyose bakeka ko gishobora guhungabanya umutekano kugira ngo gikumirwe.