Kinyarwanda
English
Abahagarariye amashyirahamwe atwara abagenzi mu modoka no kuri moto bo mu karere ka Gicumbi, baratangaza ko bagiye kugira uruhare rukomeye mu gukumira impanuka no kurwanya ibiyobyabwenge. Ibi babyiyemereye mu nama bagiranye na Polisi y’u Rwanda ikorera muri aka karere, ikaba yarabereye mu kigo abagenzi bategeramo imodoka, giherereye mu murenge wa Byumba, tariki ya 22 ugushyingo.
Abitabiriye iyi nama ni abahagarariye amashyirahamwe atwara abagenzi mu modoka ariyo RFTC, Different, Stella na Virunga; naho ku ruhande rw’abatwara abagenzi kuri moto, hari abahagarariye amakoperative ya Costram Impala, Cotramimogi na CPTMG; aya akaba agizwe n’abanyamuryango 208.
Uhagarariye ishami rya Polisi y’u Rwanda rishinzwe kubungabunga umutekano wo mu muhanda mu karere ka Gicumbi Inspector of Police (IP) Eugène Niyonzima, yabasabye gukangurira abo bashinzwe kubahiriza amategeko yose y’umuhanda mu rwego rwo kwirinda impanuka. Yagize ati:” mu gihe twegereza impera z’umwaka no gutangira undi mushya, byagiye bigaragara ko hari bamwe mu batwara ibinyabiziga bateza impanuka kubera uburangare cyangwa se ubusinzi bitewe no kwishimira ko bashoje umwaka.
Mubakangurire rero kutirara ndetse bubahirize amategeko y’umuhanda; harimo kwirinda umuvuduko ukabije, kubahiriza ibyapa, gusuzumisha ibinyabiziga hagenzurwa ko ari bizima ndetse no kwirinda gutwara ibiyobyabwenge kandi mugatanga amakuru y’abanyabyaha.
Uwari uhagarariye sosiyeti ya Stella wavuze mu izina rya bagenzi bo mu yandi masosiiyeti atwara abagenzi mu modoka witwa Harelimana Saidi, yashimiye Polisi y’u Rwanda kubera inama yabagiriye. Yavuze ko ubu butumwa bwiza bazabugeza ku bashoferi b’imodoka bityo bagafatanya kwirinda impanuka.
Uwari uhagarariye amakoperative atwara abagenzi kuri moto Habineza Innocent, yasabye abatwara moto kuba maso bakajya bamenya abo batwaye n’imizigo yabo hagamijwe kureba ko nta banyabyaha batandukanye batwaye; barimo abagizi ba nabi n’abacuruza ibiyobyabwenge; kandi bakajya baha Polisi y’u Rwanda n’izindi nzego amakuru kugira ngo habeho gukumira ibyaha hakiri kare.
