POLISI Y'U RWANDA

Ibi ni ibyavugiwe mu nama yahuje abayobozi b’inzego z’ibanze kuva kurwego rw’umudugudu kugeza kurwego rw’akarere ka Gicumbi murwego rwo gufata ingamba zo kurwanya ibyaha birimo icuruzwa ry’ibiyobyabwenge , urugomo n’amakimbirane yo mu miryango bigaragara muri aka gace.

Ni inama  yahuje abanyamabanga Nshingwabikorwa b’imirenge ya Kaniga, Mukarange, Rushaki na Shangasha mu karere ka Gicumbi iyoborwa n’umuyobozi w’Intara y’ Amajyaruguru Jean Marie Vianney Gatabazi ari kumwe n’abayobozi b’inzego z’umutekano muri iyi Ntara.

Umuyobozi w’akarere ka Gicumbi Ndayambaje Felix yavuze ko muri rusange umutekano wifashe neza.

Yagize ati “Uretse ibyaha bifitanye isano n’ibiyobyabwenge,imirenge yose igize akarere ka Gicumbi abaturage babigizemo uruhare baratekanye”.

Guverineri Gatabazi Jean Marie Vianney umuyobozi w’Intara y’Amajyaruguru yasabye abayozi kurushaho kwegera abaturage kugirango ibibazo bihari bishakirwe umuti.

Yagize ati “Kuva mubiro mukegera abaturage bizafasha mu guhangana n’ikibazo cy’imirire mibi ndetse n’igwingira ry’abana, ibibazo bituma abana bata ishuru ndetse no kurushaho kugira uruhare mu gukumira ibyiyobyabwenge n’inda ziterwa abana b’abakobwa.’’

Guverineri Gatabazi yasabye abayobozi kurushaho kurwanya ibibazo bituma abana bata ishuri birimo ababashukisha amafaranga bakabakoresha mu bucuruzi bw’ibiyobyabwenge ndetse n’ababakoresha mu mirima y’ibyayi.

Assistant Commissioner of Police (ACP) Jean Baptiste Ntaganira yagaragaje ko urugomo rukomoka kubiyobyabwenge na magendu ari bimwe mu byaha bihungabanya umutekano bikunze kugaragara muri karere ka Gicumbi.

ACP Ntaganira asoza agaragaza ko abakora ibikorwa bihungabanya umutekano baba abacuruza ibiyobyabwenge ndetse n’abakora inzoga z’inkorano akenshi babikora bitwikiriye ijoro bikaba bikwiye ko abayobozi bongera imbaraga mu kugenzura amarondo kugirango gahunda yo kwicungira umutekano yubahirizwe.

Iyi nama yafatiwemo imyanzuro igamije kwimakaza umutekano n’imibereho myiza y’abaturage irimo kurushaho kwicungira umutekano binyuze mu gukaza amarondo ndetse no gufatanya n’inzego z’umutekano kurwanya ibiyobyabwenge byugarije urubyiruko hatangwa amakuru y’aho bigaragaye.