Kinyarwanda
English
Komisiyo y’igihugu y’urubyiruko, ishyirahamwe nyarwanda ryo gusiganwa ku magare (FERWACY ) na Polisi y’u Rwanda ikorera mu karere ka Gatsibo, ku itariki ya 14 Kanama bahuriye mu gikorwa cyo gushakisha urubyiruko rufite impano mu gutwara amagare, Polisi inaboneraho umwanya wo guha urubyiruko rwari rwitabiriye iki gikorwa ubutumwa bwo kwirinda ibiyobyabwenge.
Uru rubyiruko rukaba rwaranakanguriwe kwiteza imbere, impano zarwo ntizipfe ubusa runakangurirwa gutanga ubwisungane mu kwivuza (Mituelle de Sante).
Abasiganwe bakaba baranyuze mu mirenge ya Kiziguro, Remera, Murambi na Kiramuruzi, abatsinze bahabwa ibihembo bitandukanye birimo amagare n’ibindi bikoresho bizabafasha kongera ubumenyi n’ubusobozi muri uyu mwuga.
Umuyobozi mu ishyirahamwe nyarwanda ryo gusiganwa ku magare (FERWACY) Mparabanyi Faustin, yasabye uru rubyiruko kwirinda ibikorwa byangiza ubuzima bwabo birimo kwishora mu biyobyabwenge ahubwo igihe cyabo bakagikoresha bongera ubumenyi bagaharanira kuzamura impano zabo.
Yanasezeranyije abitwaye neza ko ishyirahamwe nyarwanda ryo gusiganwa ku magare (FERWACY ) rizakomeza kubatera inkunga ngo bazamure impano zabo.
Umupolisi ushinzwe guhuza ibikorwa bya Polisi n’iby’abaturage (DCLO) mu karere ka Gatsibo Inspector of Police (IP) Roger Rwakayiro, yaganirije uru rubyiruko ku ruhare rwarwo mu kurwanya no kwirinda ibyaha birimo ibiyobyabwenge, arusaba kuba ijwi ry’amahoro, umutekano n’iterambere.
Yabashishikarije kwegera bagenzi babo bakibumbira mu ishyirahamwe rihuza urubyiruko rw’abakorerabushake mu kwicungira umutekano (Rwanda Youth Volunteers in Community Policing- RYVCP), nabo bagatanga ibitekerezo n’imbaraga zabo biganisha ku iterambere ryihuse ry’igihugu.
Yanabakanguriye gukunda Siporo kuko ituma ubuzima bwabo bumera neza.
