POLISI Y'U RWANDA

Kuri uyu wa 26 Gashyantare, Polisi ikorera mu karere ka Gatsibo mu murenge wa Kiziguro ku bufatanye n’urubyiruko rw’abakorerabushake rw’uwo murenge baganirije abanyeshuri bo mu ishuri ry’isumbuye rya GS Kiziguro kugira uruhare mu gukumira ibyaha bitandukanye.

Bimwe mu byo urwo rubyiruko rw’abanyeshuri rugera ku 711 rwaganirijwe birimo; kurwanya inda zitateguwe, ikoreshwa ry’ibiyobyabwenge, ihohotera n’ibindi.

Chief Inspector of Police (CIP)Jean Baptiste  Bucyangenda ushinzwe guhuza ibikorwa bya Polisi n’abaturage  mu karere ka Gatsibo ,  yasabye abanyeshuri ba GS Kiziguro  kugira uruhare rugaragara  mu guharanira uburenganzira bwabo n’ubwa bagenzi babo batanga amakuru y’abana bavutswa uburenganzira bwabo.

Yagize ati:”Uburenganzira bw’umwana ntibukwiriye kuvogerwa cyangwa ngo bubangamirwe na buri wese yaba umubyeyi kimwe n’undi wese ufite inshingano zo kumurera. Iyo umubyeyi agukoresha imirimo ivunanye bigira ingaruka kumikurire yawe nk’umwana, iyo akubujije kujya ku ishuri aba akwimye uburenganzira bw’ingirakamaro  kuko bidindiza iterambere ryawe ndetse  n’iry’igihugu muri rusange.”

Yakomeje ababwira ko iryo ari ihohoterwa rikorerwa abana, abasaba no kurwanya n’irindi iryo ari ryose ribangamira uburenganzira bw’ikiremwa muntu, aho yabahaye urugero rw’ihohotera rishingiye ku gitsina, iribabaza umutima n’umubiri, irishingiye ku mutungo n’andi.

Ababwira ko ayo yose agira ingaruka mbi ku mikurire no ku myigire y’umwana cyane iyo rikorwa hagati y’ababyeyi be.

CIP Bucyangenda yasabye abo abanyeshuri kurwanya inda zitateguwe mu mashuri kuko ari kimwe mu bituma bata amashuri, bikadindiza imyigire yabo ndeste bamwe bikabaviramo kureka ishuri burundu.

Yagize ati:” Iyo mutwaye inda mukiri bato bibagiraho ingaruka nyinshi, benshi bava mu ishuri abandi mugafata inshingano zo kurera mu kiri  bato , abandi bagacibwa mu miryango ndetse no kurwara indwara zitandukanye zirimo n’agakoko gatera SIDA.  Turabasaba rero kwirinda ababashukisha impano zitandukanye, ababaha amafaranga kuko ibyo byose ari intandaro yo kubagusha mu bishuko byo kubasambanya.” 

Yaboneyeho kubabwira ko mu gihe bahura n’ikibazo k’ihohoterwa rishingiye ku gistina  bahamagara umurongo wa Polisi utishyurwa ariwo 3512.

CIP Bucyangenda yibukije abanyeshuri ba GS Kiziguro kwirinda kwishora mu ikoreshwa ry’ibiyobyabwenge kuko benshi mu babikoresha bibagiraho ingaruka zitari nziza nko kuva mu ishuri ,gusara bitewe nuko byamaze kuba byinshi mu mubiri n’ibindi bibi byinshi bihungabanya umutekano, abasaba gushinga amatsinda yo kubirwanya no kujya batangira amakuru ku gihe aho babibonye. 

Muhimpundu Riziki umuhazabikorwa w’urubyiruko rw’abakorerabushake mu murenge wa kiziguro, yasabye uru rubyiruko rugenzi rwe ku ba intangarugero muri byose haba mu ishuri ndetse naho batuye kuko igihugu gishingiye ku rubyiruko ruzima kitarufite nta terambere cyageraho.