Kinyarwanda
English
Umuyobozi wa Polisi y’u Rwanda mu karere ka Gatsibo, Chief Inspector of Police (CIP) Eric Kabera, yakanguriye abagize komite zo kwicungira umutekano (Community Policing Commitees - CPCs) bo mu murenge wa Rugarama, mu karere ka Gatsibo, bagera kuri 250, kongera imbaraga mu gukumira ibyaha mu rwego rwo kurushaho gusigasira umutekano muri uyu murenge.
Ibi yabibakanguriye mu nama yagiranye nabo ku itariki 19 Gicurasi mu kagari ka Gihuta, yari yitabiriwe n’ushinzwe irangamimerere muri uyu murenge, Umubyeyi Hadidja.
Mu byaha CIP Kabera yabakanguriye kurushaho kurwanya no gukumira harimo inyobwa, itundwa, n’icuruzwa ry’ibiyobyabwenge nk’urumogi n’inzoga z’inkorano zitemewe zirimo izo bita Muriture, Nyirantare, Ibikwangari, Marokeri, n’Imifwe.
Yabasobanuriye ko ibiyobyabwenge n’inzoga z’inkorano zitemewe uretse kuba ku isonga mu bituma uwabinyoye, akora ibyaha birimo gukubita no gukomeretsa, ubujura, gusambanya abana, gufata ku ngufu, n’ihohoterwa rishingiye ku gitsina, bimutera uburwayi butandukanye.
Ati: "Kubera ko biriya byaha biteza umutekano muke, niyo mpamvu imbaraga zigomba gushyirwa cyane mu kubikumira, ariko kandi mu gihe bibaye, hagatangwa amakuru ku gihe yatuma ababikoze bafatwa vuba."
Mu bindi CIP Kabera yababwiye kujya bakangurira abaturage harimo kuba ijisho ry’umuturanyi, kwirinda amakimbirane no kuyakemura mu bwumvikane, cyangwa bakagisha inama mu gihe abayeho, aho kwihanira, amakosa bamwe bafata nk’uburyo bwo kuyakemura.
Yababwiye kandi kurwanya icuruzwa ry’abantu babwira urubyiruko ko iyo babagejeje hanze aho baba babijeje kubaha cyangwa kubashakira akazi n’amashuri byiza, babafata bugwate maze bakabakoresha imirimo y’agahato kandi nta gihembo.
Umubyeyi yabashimiye uruhare n’ubufatanye bwabo mu kunganira inzego z’umutekano mu kubungabunga umutekano muri uyu murenge.
Yababwiye kuba inyangamugayo n’intangarugero mu byo bakora, no kugisha inama mu gihe bibaye ngombwa, kandi abasaba gukomeza gufatanya no gukorana neza n’abaturage kugirango bakomeze kubungabunga umutekano w’aho batuye.
