Abanyeshuri barererwa mu rwunge rw’amashuri rwa Rwanyanza mu kagari ka Ngiryi, mu murenge wa Jabana mu karere ka Gasabo mumpera z’icyumweru dushoje baganirijwe na Polisi uko barushaho kwicungira umutekano birinda ababashuka bakabashora mu ngeso mbi zirimo ibiyobyabwenge n’ubusambanyi.

Ni ibiganiro byahawe abanyeshuri basaga 450 bitangwa  na Chief Inspector of Police (CIP) Irene Umuhozari ushinzwe  guhuza ibikorwa bya Polisi n’abaturage hagamijwe gukumira ibyaha ari kumwe na Kabandana Theogene  umuyobozi w’ishuri.

CIP Umuhozari yabasabye guha ubuzima agaciro bakirinda ababashuka bagamije kwangiza ejo hazaza habo.

Yagize ati” Hari ababashukisha ibintu bitandukanye bagamije kubashora mu ngeso mbi zirimo ibiyobyabwenge, n’ubusambanyi ibi byose bigira ingaruka kubuzima bwanyu kuko usanga hari abatwara inda bakiri bato bikabaviramo guta ishuri ejo habo hakangirika.

CIP Umuhozari yakomeje agira inama uru rubyiruko ko rukwiye gushishoza rukirinda ababashuka ko bashobora kubabonera amashuri n’akazi keza hanze y’Igihugu.

Yagize ati” Hirya no hino ku isi hari icuruzwa ry’abantu aho usanga umuntu utazi akwereka ko hari aho yakujyana ukabona akazi cyangwa amashuri meza. Mu gihe ugezeyo ugakorerwa ihohoterwa. Mu kwiye kwitwararika igihe hari ubikubwiye ukihutira gutanga amakuru kunzego z’ubuyobozi  zikwegereye.”

CIP Umuhozari asoza asaba aba banyeshuri kuba intangarugero mu kurwanya ibiyobyabwenge kuko bikomeje kwangiza ubuzima bw’urubyiruko.

Yagize ati’’ Nkabantu mu maze gusobanukirwa n’ingaruka z’ibiyobyabwenge haba kubuzima ndetse no ku mutekano mu kwiye kugira uruhare mu guhindura bagenzi banyu bakomeje kugaragara mu ngeso mbi mu natanga amakuru y’aho bigaragara .’’

Kabandana Theogene umuyobozi wa GS Rwanyanza yashimiye byimazeyo Polisi y’u Rwanda kuba yarafashe umwanya ikaza gutanga ibiganiro mu banyeshuri abereye umuyobozi.

Yavuze ko umutekano utareba inzego z’umutekano gusa, akaba yaraboneyeho gusaba  abanyeshuri  kugira uruhare mu kuwubungabunga,batangira amakuru ku gihe.

Abanyeshuri bishimiye ibiganiro bahawe bizeza Polisi ubufatanye mu kurwanya ibiyobyabwenge, icuruzwa ry’abantu ndetse n’ihohoterwa binyuze mu nyigisho zizatangirwa mu mahuriro arwanya ibyaha yashinzwe muri iri shuri.