POLISI Y'U RWANDA

Ibi byakozwe muri gahunda yo gukumira no kurwanya ibyaha ndetse no kuzamura imibereho myiza y’abaturage Polisi y’u Rwanda ikorana n’abafatanyabikorwa bayo.  Muri abo bafatanyabikorwa harimo urubyiruko rw’abakorera bushake mu gukumira no kurwanya ibyaha mu baturage. Kuri uyu wa Gatanu tariki ya 18 Ukwakira Polisi y’u Rwanda ikorera mu mujyi wa Kigali yagiranye ibiganiro n’urubyiruko ruhagarariye  abandi mu mirenge yose igize akarere ka Gasabo.

Ibiganiro byatanzwe n’umupolisi ushinzwe uburere mboneragihugu no guhuza ibikorwa bya Polisi n’abaturage hagamijwe kurwanya ibyaha mu mujyi wa Kigali (RPCEO), Chief Inspector of Police (CIP)  Joseph Nzabonimpa ari nawe watanze ibiganiro.

CIP Nzabonimpa yasabye uru rubyiruko ruhagarariye urundi mu mirenge gukorana bya hafi n’abaturage ndetse n’izindi nzego hagamijwe gukumira ibyaha, bakajya bahanahana amakuru.

Yagize ati: ”Mukwiye gukorana bya hafi n’abaturage mukarwanya ibyaha bikunze kugaragara mu muryango nyarwanda nk’amakimbirane mu miryango, abana bata amashuri, inda ziterwa abangavu, ibiyobyabwenge n’ibindi bitandukanye.”

Yakomeje asaba uru rubyiruko gukurikirana  imibereho myiza y’abaturage, bakareba ingo zirimo abana bafite ibibazo by’imirire mibi ndetse n’isuku nke.

Yagize ati: ”Burya abaturage badafite imibereho myiza nta mutekano baba bafite, mujye musura abaturage mumenye imiryango irimo ibibazo by’imirire mibi, abararana n’amatungo mu nzu hakorwe imiganda yo kubakiza ibyo bibazo.”

Rutayisire  Christopher, uhagarariye urubyiruko rw’abakorerabushake mu karere ka Gasabao  yavuze ko bishimira ibiganiro n’impanuro  Polisi igenda ibagezaho zibahwitura ku mirimo yabo ya buri munsi.

Rutayisire yavuze ko muri uyu mwaka urubyiruko rw’abakorerabushake bafite imihigo itandukanye harimo no kuzamura imibereho myiza y’abaturage.

Yagize ati: ”Dufite umuhigo wo kubaka uturima tw’igikoni 40 muri buri kagari, kubakira ubwiherero imiryango itishoboye, kujya mu bigo by’amashuri tukaganiriza abanyeshuri kwirinda ibiyobyabwenge n’inda ziterwa abangavu. Ibi kandi tuzabifatanya no gukora ubukangurambaga mu baturage mu kurwanya ibyaha no kuzamura imibereho yabo.”

Aya mahugurwa yari yitabiriwe n’urubyiruko ruhagarariye abandi muri buri murenge ugize akarere ka Gasabo uko ari imirenge 15, abitabiriye bakaba bari 21.