POLISI Y'U RWANDA

Mu cyumba cy’inama cy’umurenge wa Kimironko mu karere ka Gasabo, ku cyumweru tariki ya 6 Gicurasi, ishami rya Polisi y’u Rwanda rishinzwe kuzimya inkongi z’umuriro no gutabara abari mu kaga ryahahereye amahugurwa yo gukumira, kurwanya no kwirinda z’umuriro abayobozi n’abakozi b’ amahoteri na za resitora-bar bakorera mu karere ka Gasabo barenga 250.

Assistant Inspector of Police (AIP) Janvier Nkusi wo mu ishami rya polisi y’u Rwanda rishinzwe kuzimya inkongi z’umuriro no gutabara abari mu kaga watanze ayo mahugurwa, yigishije abayitabiriye  uburyo bwo kwirinda no kurwanya inkongi z'imiriro, ibitera inkongi y'umuriro, ingaruka ziterwa n’inkongi y'umuriro ndetse n’ingamba zo gukumira inkongi y'umuriro

Yaravuze ati:”Nubwo hari ibintu byinshi bishobora guteza inkongi z’umuriro, amashanyarazi niyo nkomoko y’ibanze y’inkongi z’umuriro. Ibi ahanini bituruka ku nsinga zishaje ndetse zitujuje ubuziranenge ziba ziri mu mazu hirya no hino, ndetse hakiyongeraho ko n’abazishyira ku mazu baba nta bumenyi buhagije babifitemo.”

Yababwiye ko ikindi gishobora gutera inkongi z’umuriro ari ikoreshwa nabi ry’ingufu z’amashanyarazi cyane cyane gukoresha ingufu z’amashanyarazi zirengeje ubushobozi bw’insinga ziba zarashyizwe ku mazu, nk’aho usanga inzu ziba zaragenewe guturwamo hanyuma zigahindurwamo inzu z’ubucuruzi nka za resitora, za hoteri n’izindi.

AIP Nkusi yaboneyeho gusaba abanyamahoteri na resitora kugira ibikoresho by’ibanze birwanya inkongi z’umuriro bizwi nka “Kizimyamwoto”, no kugira ubumenyi bw’ibanze mu kubikoresha kugirango bibe byabafasha kwitabara mu gihe zibayeho.

Yanababwiye ko ibindi umuntu ashobora kwifashisha azimya umuriro harimo amazi n’umucanga.

AIP Nkusi yababwiye ko mu rwego rwo gukumira no kurwanya inkongi z’umuriro no gutabara abari mu kaga, Polisi y’u Rwanda yashyizeho ishami rishinzwe by’umwihariko   kuzikumira, kuzirwanya no gutabara abari mu kaga vuba rizwi ku izina rya  “Fire  and Rescue Brigade.”

Yasoje ababwira ko baramutse bahuye n’ikibazo cy’inkongi y’umuriro bakwihutira guhamagara imirongo ikurikira: 111 na 112 cyangwa 0788311224,   07888311120,  0788311335 bagatabarwa byihuse.

Aya mahugurwa kandi yanitabiriwe n’inzego zifite aho zihurira n’umutekano zirimo DASSO, CPCs n’abagize irondo ry’umwuga.