POLISI Y'U RWANDA

Ku itariki ya 31 Kanama 2017, Polisi y’u Rwanda mu karere ka Gakenke k’ubufatanye n’umurenge wa Gakenke bagiranye inama n’abatwara abagenzi kuri Moto, aba bazwi ku izina ry’Abamotari.Muri iyo nama Abamotari bahigiye kuzubahiriza inama bagiriwe zo gukumira ibyaha mu gihe bari mu kazi kabo no kubahiriza amategeko y’umuhanda yose uko yakabaye.

Muri iyi nama Polisi y’u Rwanda yari ihagarariwe n’umuyobozi wa Polisi mu karere ka Gakenke Chief Inspector of police (CIP) Berchimas Dusengimana, naho ubuyobozi bw’umurenge wa Gakenke bwari buhagarariwe n’umunyamabanga Nshingwabikorwa  Cyubahiro Celestin. Ni inama yari igamije ubukangurambaga ku batwara abagenzi kuri moto mu gukumira no kurwanya ibyaha bikunze kugaragara muri uyu murenge wa Gakenke.

Ingingo zibanzweho muri iyi nama ni ukugaragariza abamotari  uruhare rwabo mu gucunga umutekano no kwirinda amakosa yo mu muhanda, ibi bigakorwa batangira amakuru ku gihe.

Umuyobozi wa Polisi mu karere ka Gakenke, yarabibukije ko nk’abantu batwara abagenzi batandukanye kuri Moto, bagomba kujya bagira amakenga ku bantu batwara, kuko hashobora kwihishamo abafite ibintu bihungabanya umutekano.

Yagize ati:  Mwebwe mu kazi kanyu ka buri munsi mutwara abantu batandukanye, muri bo hari abo usanga batwaye ibintu bishobora guhungabanya umutekano w’igihugu, aha twavuga nk’urumogi, Kanyanga n’ibindi biyobyabwenge bitandukanye. Murasabwa kujya mugirira amakenga uwo ariwe wese mutwaye . Mugihe hari icyo mubonye cyangwa muketse mugahita mutanga amakuru.

CIP Dusengimana yakomeje abasaba kwirinda amakosa yo mu muhanda nayo akunze kugaragara kuri bamwe mu bamotari. By’umwihariko, yasabye abayobozi b’amakoperative y’abo bamotari, kujya bagenzura abanyamuryango babo dore ko hari ubwo usanga hari abinjira muri ayo makoperative badafite ibyangombwa byo gutwara ibinyabiziga.

Yagize ati: Bayobozi b’amakoperative mujye mugenzura abanyamuryango banyu ndetse mugire n’amabwiriza mugenderaho.Hari abanjira muri koperative badafite ibyangombwa byo gutwara, ugasanga ariyo ntandaro yo kwica amategeko y’umuhanda bigateza impanuka za hato na hato.

Cyubahiro Celestin , Umunyamabanga Nshingwabikorwa w’umurenge wa Gakenke we yasabye aba bamotari kubahiriza amabwiriza ya Leta no gutanga amakuru ku gihe, byose bigakorwa binyuze mu nzira zitandukanye zirimo urubuga nkoranyambaga (Whatsapp) rwabashyiriweho nabo ubwabo  bazi kandi banatangiye gukoresha,  ndetse no guhamagara ku murongo wa telefoni Polisi ihakorera yabahaye, cyangwa se bakagana sitasiyo ya polisi ku murenge wabo.

Uhagarariye abamotari bibumbiye muri Koperative yabo COOPTAMOGA, Nshakabyanga Augustin Moise,  yahigiye   ku mu garagaro ko bagiye kubahiriza inama bagiriwe.

Yagize ati: Turashimira ubuyobozi butwegera bukatugira inama, ibyo tubwiwe tugiye kubishyira mu bikorwa , dukumira icyaha kitaraba kandi dutangira amakuru ku gihe.

Ubusanwe mu murenge wa Gakenke higanje ibyaha bijyanye no gucuruza ndetse no gutunda ibiyobyabwenge nk’urumogi, Kanyanga, inzoga zitemewe nka Blue Sky na African Gin.

Umurenge wa Gakenke ubarirwamo abamotari 134, bose bibumbiye muri koperative COOPTAMOGA.