Abagize Komite zo kwicungira umutekano (CPCs) bagera ku 109 bakomoka mu mirenge ya Kivuruga na Cyabingo mu karere ka Gakenke   bagiranye ibiganiro na Polisi ikorera muri aka karere  basabwa guhora batekereza ku nshingano zabo, barushaho  gukorana n’izindi nzego batangira amakuru ku gihe kugirango hakumirwe igishobora guhungabanya umutekano.

Ibi biganiro byatanzwe ku itariki 02 Ugushyingo 2018, bibera mu murenge wa Kivuruga  biyobowe  na Assistant Inspector of Police (AIP) Rwatangabo Bizimana ushinzwe guhuza ibikorwa bya Polisi n’abaturage hagamijwe gukumira no kurwanya ibyaha (DCLO) muri aka karere ari kumwe na Nyirabuheta  Beatha  umukozi wa Minisiteri y’ubutabera ushinzwe gutanga ubufasha  mu by’amategeko mu karere ka Gakenke.

AIP Bizimana yibukije abagize izi Komite z’abaturage zo kwicungira umutekano ko bakwiye guhuza inshingano zabo bakazihuza n’icyizere bafitiwe n’abaturage babatoye.

Yagize ati “Ubutumwa bwose mutanze kubaturage burakirwa kuko babafitiye ikizere. Mukoreshe aya mahirwe mutanga ibiganiro ku makimbirane yo mu miryango ndetse n’uko abaturage bagira uruhare mu kwicungira umutekano binyuze mu gukora amarondo.”

AIP Bizimana akomeza agaragara ko muri rusange ibyaha bigenda bigabanuka ariko hakiri byinshi byo gukora buri wese akaba akwiye kurushaho kunoza inshingano ze.

Yaravuze ati ’’Mugomba guhora mufite amakuru y’uko umutekano uhagaze iwanyu mu midugudu, mu gihe mugize icyo mumenya gishobora kuwuhungabanya, mukwiye kwihutira gutanga amakuru kugirango bikumirwe bitaraba, izo nizo nshingano z’ibanze buri wese akwiye guhora azirikana.’’

Nyirabuheta  Beatha   umukozi wa Minisiteri y’ubutabera ushinzwe gutanga ubufasha  mu by’amategeko mu karere ka Gakenke yasabye CPCs kuba abafashamyumvire mu guhindura abaturage bakigaragara mu bikorwa by’amakimbirane n’ihohoterwa.

Yagize ati “Hirya no hino mu midugudu mutuyemo haracyagaragara ihohoterwa rikorerwa mu mu ryango akenshi ryiganjemo irikorerwa abana n’abagore. Mudufashe kurirwanya binyuze mu biganiro bitangirwa mu Nteko z’abaturage mugaragaza ko ari icyaha gihanwa n’amategeko.”

Komite z’abaturage zo kwicungira umutekano (CPCs) zashyizweho mu mwaka wa 2007, zikaba zigizwe n’ abaturage b’ inyangamugayo  batorwa na bagenzi babo bagakorera ku rwego rw’akagari n’umurenge  aho bakusanya bakanatanga amakuru afasha mu gukumira no kurwanya ibyaha.