Kinyarwanda
English
Mu Ishuri rikuru rya Polisi (NPC) riherereye mu Karere ka Musanze, kuri uyu wa Gatandatu tariki ya 13 Kamena, habereye ibirori byo kwakira ku meza ba Ofisiye bakuru 38 bagize icyiciro cya 14 cy'amasomo ajyanye n'ubuyobozi (Police Senior Command and Staff Course) atangirwa muri iri shuri mu gihe cy'umwaka.
Ibi birori byo gusangira byabahuje n'imiryango yabo, abayobozi bakuru ba Polisi y'u Rwanda n'abandi batumirwa batandukanye, byateguwe mu rwego rwo kwifatanya no gusabana bishimira ibyo bagezeho mu gihe cy'umwaka bamaze bakurikirana aya masomo bitegura gusoza.
Aya masomo yitabiriwe na ba Ofisiye bakuru bakomoka mu bihugu icumi (10) bitandukanye by'Afurika; ari byo; Eswatini, Gambia, Kenya, Malawi, Namibia, Repubulika ya Santrafurika, Somalia, Sudani y'Epfo, Uganda, n'u Rwanda rwabakiriye.
Umuyobozi Mukuru wungirije wa Polisi y’u Rwanda (DIGP) ushinzwe ubutegetsi n’abakozi, DCG Jeanne Chantal Ujeneza, yabashimiye umurava, ubushake n'ubwitange byabaranze mu gihe cy’umwaka bamaze biga muri iri shuri.
Yagize ati:“ Ndabashimira kuba mwarakurikiye amasomo mwize kandi mukaba muyasoje neza. Mukomeze kugira ubutwari n’ubwitange nk'uko mwabigaragaje mu gihe mumaze hano, muzakomeza gukoresha ubumenyi mwungutse mu guteza imbere ibigo mukoreramo binyuze mu buyobozi bushingiye ku bunyangamugayo n’ubunyamwuga. Muri iki gihe cy'iterambere ryihuta niko n'ibibazo by'umutekano birushaho kurenga imbibi z'ibihugu, ubufatanye bukomeye n'ubwumvikane hagati y'abayobozi ba Polisi bikomeza kuba ingenzi kugira ngo tugere ku ntsinzi twese dusangiye."
Umuyobozi w’ishuri rikuru rya Polisi, Commissioner of Police (CP) Christopher Bizimungu, yabifurije ikaze muri uyu musangiro, agaruka ku bihe by'ingenzi byaranze amasomo yitabiriwe na ba Ofisiye bakuru mu gihe cy'umwaka bahamaze.
Yabashimiye ku bw’imbaraga, imyitwarire myiza, ubushobozi n'umuhate byabaranze mu gihe cy'amasomo, abasaba kuzashyira mu bikorwa ubumenyi bungutse kandi babikora kinyamwuga.
Mu gihe cy’umwaka umwe bamara biga, ba ofisiye bakuru mu nzego zishinzwe iyubahirizwa ry’amategeko, bahabwa amasomo akubiye mu byiciro bitandukanye birimo amasomo y’icyiciro cya gatatu cya Kaminuza (Masters) mu bijyanye n'amahoro no gukemura amakimbirane, ubumenyi ku miyoborere, n’ayerekeranye n’ibikorwa byo kubungabunga amahoro.
Ni gahunda igamije kubongerera ubumenyi n'ubushobozi mu bijyanye no kuyobora, gutegura ibikorwa by’umutekano n'imikorere ya Polisi igezweho mu gukemura ibibazo by’umutekano no kurwanya ibyaha byambukiranya imipaka himakazwa amahoro n’umutekano mu Karere, ku mugabane no ku isi muri rusange.
