POLISI Y'U RWANDA

Umuyobozi Mukuru wa Polisi yú Rwanda wungirije ushinzwe ibikorwa (DIGP), CP Vincent Sano, kuri uyu wa Gatanu tariki ya 24 Mata, yasoje ku mugaragaro icyiciro cya kane cy’amahugurwa y'ibanze y'ibikorwa bya Polisi byihariye mu gucunga umutekano (Basic Police Special Forces course 04/2026).

Ni amahugurwa yari amaze amezi atatu (3), abera mu kigo cya Polisi gitangirwamo amahugurwa yo kurwanya iterabwoba (Counter-Terrorism Training Center-CTTC) giherereye i Mayange mu Karere ka Bugesera, ari naho habereye uyu muhango, akaba yaritabiriwe n'abagera ku 1697 barimo abapolisikazi 312 na 38 b’Urwego rw’igihugu rushinzwe igorora (RCS).

Bize amasomo atandukanye arimo ubuhanga mu gukoresha intwaro no kumasha, imyitozo njyarugamba ibikorwa byo gucunga umutekano rusange mu gihe cy’imyigaragambyo, kunyura mu nzitane hakoreshejwe amayeri n’ubumenyi buhanitse mu gutegura no gushyira mu bikorwa ibikorwa byihariye bya Polisi mu kubungabunga umutekano.  

DIGP Sano yabashimiye kuba basoje amahugurwa, abibutsa ko urugendo batangiye ari urwo gushyira mu bikorwa no guteza imbere ubumenyi bahawe bitwara neza, kuko ari bwo buzagira umumaro kandi bugatanga umusaruro mwiza ku mutekano w’abantu n’ibyabo.

Yagize ati: “Musoje amahugurwa yihariye y’ibanze muri Polisi y’u Rwanda. Uko mwitwaye neza muri hano mu masomo turabasaba no kuzabikomeza mu kazi mugiyemo mu mashami atandukanye ya Polisi yú Rwanda. Mugomba rero kudatezuka, mugahora muharanira kurinda umutekano w’abanyarwanda, mwirinda icyahesha isura mbi mwebwe ubwanyu, Polisi y’u Rwanda n’igihugu muri rusange.”

Yabibukije ko umutekano w'Abanyarwanda ufite agaciro ntagereranywa bityo ko bisaba ubwitange, imbaraga no kudatezuka, abasaba gukomeza kurangwa n’ikinyabupfura no guhora bongera ubumenyi n'ubushobozi mu bijyanye no gukemura ibibazo byugarije umutekano.

DIGP Sano yabibukije kandi ko Polisi y’u Rwanda aho igeze, ibikesha ubuyobozi bwiza burangajwe imbere na Nyakubahwa Perezida wa Repubulika Paul Kagame, kandi ko ntacyo bazabura kuko aho bagiye gukorera bazasangayo abandi bapolisi, abasaba gukorera hamwe no kwibuka ko umuturage ari ku isonga.

Umuyobozi w’Ikigo gitangirwamo amahugurwa yo kurwanya iterabwoba, Commissioner of Police (CP) William Kayitare mu ijambo rye, yavuze ko mu gihe bamaze bahugurwa bigishijwe amasomo atandukanye abatoza imyitwarire myiza, ubufatanye, kwihangana no guhangana n’inzitizi mu gushyira mu bikorwa ibikorwa byihariye bya Polisi byo gucunga umutekano.

CP Kayitare yashimiye abasoje amahugurwa ku bwo kwihangana, ishyaka, n’ubwitange byabaranze, ashimira n’abarimu batanze amahugurwa ku murava, ubunyamwuga, n’ubwitange bagaragaza mu gutanga amasomo ndetse n’ubuyobozi bukuru bwa Polisi y’u Rwanda ku nkunga budahwema guha Ishuri yaba iy’ibikoresho, inama, n’ubufasha byose bifasha mu migendekere myiza y’amahugurwa.

Ikigo cya CTTC Mayange ni kimwe mu bigo bitatu bya Polisi y’u Rwanda bitangirwamo amahugurwa atandukanye. Cyashinzwe mu mwaka wa 2013, gihabwa inshingano zo guhugura abapolisi, kibubakamo ubushobozi n’ubuhanga buhanitse bwo gukumira no kurwanya iterabwoba mu Rwanda ndetse no hanze yarwo.