Kinyarwanda
English
Polisi y'u Rwanda irakangurira abaturarwanda kwirinda gukora ibirori muri ibi bihe by 'iminsi mikuru isoza umwaka kuko biri mu byatiza umurindi ikwirakwira ry'icyorezo cya COVID-19.
Ibi Polisi ibivuze nyuma y'aho mu ijoro rya tariki ya 23 Ukuboza abantu 23 bafatiwe mu rugo barenze ku mabwiriza ya Leta bakora ibirori. Aba bantu beretswe itangazamakuru kuri uyu wa Gatanu tariki ya 24 Ukuboza, berekaniwe ku cyicaro cya Polisi mu Mujyi wa Kigali i Remera mu Karere ka Gasabo.
Bariya bantu 23 bafatiwe mu bice bitandukanye bigize umujyi wa Kigali, 20 bafatiwe mu Karere ka Gasabo, Umurenge wa Kimironko bari mu birori by'isabukuru y'amavuko abandi batatu bafatiwe mu Karere ka Kicukiro mu Murenge wa Nyarugunga barimo guteza urusaku banywa n'inzoga mu gicuku.
Nakamanya Grace ni umwe mu bafashwe, yemeye amakosa yakoze ayasabira imbabazi.
Yagize ati" Twafashwe twarenze ku mabwiriza turimo kwizihiza isabukuru y'amavuko y'inshuti yacu i Kibagabaga. Twakoze amakosa ari nayo mpamvu nshishikariza abandi bantu kwirinda kuzagwa mu makosa naguyemo ahubwo bubahirize amabwiriza yo kwirinda COVID-19."
Uwase Victoire yavuze ko yahigiye isomo asaba imbabazi.
Ati "Twatekerezaga ko turibukoreshe isaha imwe gusa tugasubira mu ngo zacu Polisi itarahagera. Tuhakuye isomo kandi turagira inama n'abandi kubahiriza amabwiriza uko yakabaye kugira ngo twirinde ikwirakwira ry'iki cyorezo."
Umuvugizi wa Polisi y'u Rwanda wungirije, Chief Superintendent of Police (CSP) Africa Sendahangarwa Apollo yaburiye abantu barimo gutegura ibirori mu ngo cyane cyane muri ibi bihe by'iminsi mikuru isoza umwaka.
Yagize ati "Ingamba ku kwirinda iki cyorezo cya COVID-19 ziherutse kuvugururwa kandi zitangarizwa abaturarwanda. Ni muri urwo rwego ibirori bitemewe, tuributsa abantu ko muri ibi bihe by'iminsi mikuru buri muntu yumve ko afite inshingano zo kubahiriza amabwiriza yo kwirinda ikwirakwira rya COVID-19."
CSP Sendahangarwa yibukije abantu ko Polisi idahugiye gusa mu kugenzura iyubahirizwa ry'amabwiriza yo kurwanya COVID-19 ko ahubwo inari mu bikorwa byo kurwanya ibyaha bisanzwe. Yasabye abaturage gukomeza ubufatanye na Polisi mu kurwanya ibyaha n'abarenga ku mabwiriza yo kurwanya COVID-19 batanga amakuru hakiri kare.
Abafashwe barenze ku mabwiriza baganirijwe, barapimwa ku kiguzi cyabo bwite nyuma bashyikirizwa inzego zibishinzwe bacibwa amande.
