Kinyarwanda
English
Abapolisi b’u Rwanda bagize itsinda RWAPSU rikorera mu murwa mukuru wa Centrafrique ‘Bangui’, mu butumwa bw’Umuryango w’abibumbye (MINUSCA), ku wa Gatandatu, tariki ya 9 Nzeri, bazindukiye mu muganda rusange.
Ni igikorwa bakoze mu rwego rwo kwimakaza isuku no kurwanya indwara ziterwa n’isuku nke, cyabereye muri Quartier Castor yo muri kamwe mu turere tugize umujyi wa Bangui (3e arrondissement), witabirwa n’abarimo umuyobozi w’ako karere Atahirou Balla Dodo n’abandi bayobozi ndetse n’abaturage bahatuye biganjemo urubyiruko.
Wibanze ku gusibura imiyoboro y’amazi ku mihanda, gukuraho ibihuru mu nkengero zayo n’aho abaturage batuye, guharura ibyatsi no gukura imyanda mu mihanda.
Umuyobozi w’Akarere; Atahirou yashimiye abapolisi b’u Rwanda ku bikorwa byabo by’intangarugero mu kubungabunga amahoro n’umutekano no guteza imbere imibereho myiza y’abaturage ba Centrafrique.
Yashimiye abaturage ku mibanire myiza bagirana n’abanyarwanda bari mu butumwa bw’amahoro mu gihugu, anabasaba gukomeza uwo muco mwiza no gukunda umuganda nk'igikorwa kibahuza kigamije gukemura ibibazo bibazitira kugera ku iterambere.
Umuyobozi w’itsinda ry’Abapolisi RWAPSU, Senior Superintendent of Police (SSP) Gilbert Safari, na we yashimiye abayobozi b’inzego z’ibanze n’abaturage ku bufatanye bukomeye bafitanye mu bijyanye no kubungabunga umutekano.
Yabasobanuriye akamaro k’igikorwa cy’umuganda nk’igisubizo cy’ibibazo abaturage bahura na byo by’umwihariko ibishingiye ku isuku nke binyuze mu guhuza amaboko n’ibitekerezo hagamijwe guteza imbere imibereho myiza n’iterambere ry’ubukungu.
Itsinda RWAPSU rifite inshingano zo kurinda abayobozi bakuru muri Guverinoma ya Centrafrique n’abayobozi b’Umuryango w’Abibumbye muri icyo gihugu, barimo Intumwa yihariye y’Umunyamabanga Mukuru w’Umuryango w’Abibumbye (SRSG) n’abamwungirije babiri, Minisitiri w’intebe wa Centrafrique, Perezida w’Inteko ishinga amategeko, Minisitiri w’ubutabera n’umuyobozi wa Polisi y’Umuryango w’Abibumbye mu gihugu.
