Kinyarwanda
English
Mu irushanwa ry'umukino w'intoki wa Volleyball rihuza amakipe yo mu Karere ka gatanu k'Afurika (CAVB Zone V Club Championship), kuri uyu wa Kane tariki ya 27 Gashyantare, ikipe ya Polisi y'u Rwanda (Police VC) yerekanye ko ishobora kongera kuryegukana, itsinda NemoStars yo mu gihugu cya Uganda amaseti 3-0.
Ni irushanwa ryitabiriwe n'amakipe arenga 20 yitwaye neza mu bagabo n'abagore, mu bihugu 12 byo mu Karere k'Afurika ka gatanu, ribera i Kampala muri Uganda.
U Rwanda ruhagarariwe n'amakipe atatu mu bagabo, ariyo; Police VC, APR VC na REG, mu gihe APR WVC ariyo yitabiriye iri rushanwa mu cyiciro cy'abagore.
Ikipe ya Police VC niyo iheruka kwegukana igikombe muri iri rushanwa, mu mwaka wa 2023, ubwo ryaberaga i Kigali mu Rwanda, itsinze ku mukino wa nyuma, ikipe ya Sports-S yo muri Uganda, amaseti 3-1.
Mu mukino wa mbere yakinnye mu irushanwa ry'uyu mwaka; Police VC yongeye gushimangira ko ari ikipe ihagaze neza, itsinda ikipe ya Nemostars yo muri Uganda idakoramo.
Ni umukino wabereye kuri Lugogo Indoor stadium, aho iseti ya mbere yarangiye Police VC ifite amanota 25 kuri 15 ya Nemostars, iseti ya kabiri irangira ku manota 25-20, naho iseti ya gatatu Police VC iyitsinda ku manota 25-19.
Mu mikino y'ijonjora, Police VC iri mu itsinda rya mbere (Group A), ihuriyemo n'andi makipe atatu ariyo; Nemostars bakinnye uyumunsi, Rukinzo VC yo mu gihugu cy'u Burundi na Jeshi Stars yo muri Tanzania.
