POLISI Y'U RWANDA

Polisi  ikorerera mu karere ka Burera , ku bufatanye  n’ubuyobozi bw’akarere baganirije abanyeshuri barererwa  muri GS Kinyababa, bakangurirwa gufasha mu guhindura imyumvire y’ abakomeje kwangiza  ibidukikije, mu mirenge itandukanye batuyemo.

Abagera kuri 355 barererwa muri GS Kinyababa nibo baganirijwe na Assistant Inspector of polisi (AIP) Phelin Nshimyumukiza ushinzwe guhuza ibikorwa bya Polisi n’abaturage mu karere ka Burera hagamijwe gukumira no kurwanya ibyaha ari kumwe n’umunyamabanga nshingwa bikorwa w’umurenge wa Kinyababa, Nyirasafari Marry ndetse n’umuyobozi ushinzwe urubyiruko n’umuco  mu karere   ka Burera, Nsengiyumva Jean dela Croix.

Mu kiganiro yabagejejeho, AIP Phelin Nshimyumukiza yashimiye aba banyeshuri ubufatanye bahora bagaragariza Polisi ikorera muri Burera muri gahunda yo gukumira no ku rwanya ibyaha bitandukanye binyuze mu matsinda atandukanye yashinzwe naba banyeshuri(anti-crime clubs) .

AIP  Nshimyumuiza yagize ati’’ Binyuze muri anti-drug club irwanya ibiyobya bwenge ikorera muri iri shuri, ibyaha bikomoka ku biyobyabwenge byaragabanutse ku buryo bugaragara, nk’urubyiruko rero imbaraga zanyu zirakenewe mu kurwanya abonona ibidukikije kuko   nabyo ni ibyaha nk’ibindi kandi amategeko arabahana, mudufashe kubikangurira abo muturanye.’’

Yashoje abwira  uru rubyiruko ko akarere batuyemo kagizwe n’imisozi ihanamye, abibutsa ko ibidukikije biramutse bitabungabunzwe byagira ingaruka zitari nke ku miryango yabo,  zirimo imfu zitunguranye ziterwa n’imyuzure n’inkangu ziriduka kumisozi n’ibindi biza bitandukanye.

Umuyobozi w’umurenge we yagize ati:’’ Mwagize amahirwe yo kwiga muzi, akamaro k’ibidukikije ku mwuka umuntu ahumeka, mukwiye gufata iyambere mu kugira icyo mufasha igihugu cyanyu, mukwiye kurwanya abatema ibiti ku misozi n’abahinga hafi y’imigezi  bigateza isuri n’imyuzure bikomeje gutwara ubuzima bw’abacu n’ ubutaka bwacu mu mahanga.’’

Nsengiyunva Jean dela Croix ushinzwe urubyiruko n’umuco mu karere ka Burera yibukije uru rubyiruko ko ari imbaraga z’igihugu,   abasaba guharanira gusiga isi ari nziza kurusha uko bayisanze.

Nawe yagize ati:” Mukwiye guharanira kugira u Rwanda rwiza ndetse n’isi muri rusange, ni ngombwa ko mufata iyambere  mu kurwanya isuri mutera ibiti ku misozi itandukanye aho mutuye,mukwiye  kandi  kurushaho kwitabira gahunda za Leta zirimo umuganda,inama  zitandukanye kandi mugatangamo ibitekerezo.’’

Uru rubyiruko rwanahawe ibiganiro bitandukanye birimo ibyo kurwanya ibiyobyabwenge   kurwanya iterabwoba n’icuruzwa ry’abantu,  ibyo kurwanya imirimo ikoreshwa abana, kwirinda gushaka bakiri bato, ndetse n’inda zitateguwe.

Abanyeshuri ba GS Kinyababa batangajeko inyigisho bahawe bazungukiyemo byinshi birimo uko barwanya ihohoterwa rikorerwa abana, ndetse n’icuruzwa ry’abantu kandi  bizeza aba bayobozi ko mu minsi ya vuba bazaba bashyizeho itsinda rirengera  ibidukikije (Environmental club) .