Kuri uyu wa 22 Kanama, Polisi y’u Rwanda mu karere ka Burera yafashe ibicuruzwa bya magendu n’inzoga zitemewe byinjiye mu gihugu mu buryo bunyuranyije n’ amategeko.

Ibi bicuruzwa byafatiwe mu murenge wa Cyanika mu modoka zavaga ku mupaka wa Cyanika zerekeza mu Mujyi wa Musanze.

Umuvugizi wa Polisi y’u Rwanda mu  Ntara y’ Amajyaruguru Chief Inspector of Police ( CIP) Hamdun Twizeyimana  avuga ko babonye amakuru ko mu muhanda Cyanika- Musanze hari imodoka zitwaye magendu n’inzoga zitujuje ubuziranenge.

Yagize ati:’’ Bamwe mu baturage  batuye mu murenge wa Cyanika baduhaye amakuru ko mu muhanda Cyanika Musanze hari abagenzi batwaye magendu n’inzoga zitemewe, Polisi yahise itangira ibikorwa byo kubafata , bafatirwa mu  kagari ka Kagitega.’’

CIP Twizeyimana akomeza avuga ko ibicuruzwa byafashwe bigizwe  n’amaduzene 18 ya Novida, amaduzeni 110 y’amashashi, amabaro 24 y’imyenda n’inkweto bya caguwa ndetse n’amaduzeni 10 y’inzoga zitemewe zo mubwoko bwa Blue sky.

CIP Twizeyimana yakanguriye abaturage kwirinda ubucuruzi bwa magendu kuko bubateza igihombo.

Yagize ati: ’’ Magendu iteza igihombo abayishoramo, ikanadindiza iterambere ry’ Igihugu bityo kuyirwanya bikaba bikwiye kuba ibya buri wese mu rwego rwo kurengera inyungu rusange, abashaka gucuruza bagakora ubucuruzi bwemewe n’amategeko".

CIP Twizeyimana asoza asaba abaturage kurushaho kurwanya magendu n’ibindi byaha batanga amakuru ku nzego z’umutekano.

Yagize ati: ’’ Mukwiye kumva ko kubaka igihugu ari ibya buri wese, mu gihe utanze amakuru y’abakora ubucuruzi bwa magendu cyangwa abashaka gukora ibyaha bitandukanye birimo gucuruza ibiyobyabwenge n’inzoga zitemewe uba utanze umusanzu wawe mu kubaka igihugu.’’

Magendu ni cyimwe mu bikorwa bimunga ubukungu bw’Igihugu kuko iyo imisoro n’amahoro byagakoreshejwe mu kubaka ibikorwa remezo birimo, imihanda, amashuri, ibitaro, inyerejwe  ubukungu bw’igihugu buradindira bityo igenamigambi n’imibereho myiza y’abaturage ntibigerweho ku kigero gikenewe. Polisi y’u Rwanda n’inzego zitandukanye zikaba zarahagurukiye ku birwanya, aho abanyarwanda basabwa gukora ubucuruzi bw’ubahirije amategeko.