POLISI Y'U RWANDA

Kuwa 20 Gashyantare 2018, Polisi y’u Rwanda ikorera mu karere ka Burera ifatanyije n’izindi nzego z’umutekano n’abayobozi b’inzego z’ibanze bakoze igikorwa cyo kwangiza ibiyobyabwenge n’inzoga z’inkorano zitemewe. Ni igikorwa cyabereye mu mirenge ya Rusarabuye, Butaro, Bungwe, Cyanika na Gahunga hakaba harangijwe ibiyobyabwenge bifite agaciro ka Miliyoni zirenga umunani n’ibihumbi Magana ane by’amafaranga y’u Rwanda, byose bikaba byarafashwe mu mezi abiri ashize.

Ibiyobyabwenge n’inzoga zangijwe ni ibiro umunani n’igice by’urumogi, litiro 1513 za Kanyanga, amashashi 72.480 y’inzoga zitemewe mu Rwanda arizo Chief Waragi, zebra waragi, sky blue, leaving waragi, chase vodka, coffee spirit, host waragi, kitoko na kick waragi.

Mu zindi nzoga zamenwe harimo izikorerwa mu Rwanda zifite amazina atandukanye nka umuhuza, Musanze wine, kambuca, umurava na salama wine.

Mu ijambo yagejeje ku baturage b’Umurenge wa Cyanika, Umuyobozi w’Akarere ka Burera Uwambaje Marie Florence, yabakanguriye kwirinda ibiyobyabwenge n’inzoga zitemewe, inda zitateguwe no kwita ku isuku, abasaba gukorana bya hafi n’abayobozi b’inzego z’ibanze n’iz’umutekano.

Yaravuze ati:”Abishora mu biyobyabwenge, ahanini ni nabo usanga bagaragara mu bikorwa bihungabanya umutekano n’ibya kinyamaswa birimo gusambanya abana no kubatera inda bakiri bato.twe nk’ababyeyi n’abayobozi biri mu nshingano zacu gufatanya tukamenya abantu nk’abo, tukabashyikiriza inzego z’umutekano.”

Uwambaje yanabasabye kwita ku isuku yabo n’aho batuye kugirango birinde indwara ziterwa n’umwanda.

Mu murenge wa Rasarabuye, iki gikorwa cyari kitabiriwe n’Umuyobozi w’akarere wungirije ushinzwe ubukungu n’iterambere Habumuremyi Evaristeakaba yarashishikarije abaturage gufatanya n’inzego z’umutekano mu guca burundu ikoreshwa ry’ibiyobyabwenge, kwitabira gukora imirimo ibateza imbere aho kuganisha ibitekerezo byabo mu biyobyabwenge n’inzoga zitemewe kuko bibakururira ubukene n’umwiryane.

Umuyobozi wa Polisi mu karere ka Burera, Senior Superintendent  of Police (SSP) Alex Fata, yasabye abaturage gufatanya n’inzego z’umutekano mu guhashya ibiyobyabwenge n’inzoga zitemewe kuko ari imbarutso y’urugomo n’amakimbirane bikunze kugaragara mu miryango.

Akarere ka Burera kari mu turere tugaragaramo cyane ibiyobyabwenge n’amoko menshi y’inzoga zitemewe mu Rwanda.