POLISI Y'U RWANDA

Kuri uyu wa 30 Ugushyingo mu karere ka Burera mu murenge wa Rusarabuye  hamenewe mu ruhame  ibiyobyabwenge bitandukanye byafatiwe mu mirenge ya Cyeru, Rwerere na Rusarabuye  byafashwe na Polisi kubufatanye n’abaturage.

Ibiyobyabwenge byamenwe bigizwe na Litiro 296 za kanyanga,urumogi, amaduzene 169 ya chief warage, amaduzene 210 ya Blue sky,amaduzeni 38 ya kick warage, ndetse n’amaduzene 64 ya chase vodka byose bifite agaciro gasaga miliyoni imwe n’ibihumbi Magana inani (1,866,200 Frw).

Ibikorwa byo kumena ibi biyobyabwenge byitabiriwe n’umuyobozi ku rwego rw’akarere ushinzwe imiyoborere myiza Ayinkamiye Peragie arikumwe na Chief Inspector of Police (CIP) Justin Kajeje ushinzwe guhuza ibikorwa bya Polisi n’abaturage hagamijwe gukumira ibyaha muri aka karere  ndetse n’abaturage batuye mu kagari ka Ndago mu murenge wa Rusarabuye basaga 250.

Ayinkamiye Peragie ushinzwe imiyoborere myiza mu karere ka Burera yibukije abaturage ko ibiyobyabwenge ari inzitizi z’imibereho myiza n’iterambere.

Yagize ati “Ibiyobyabwenge bifite ingaruka ku buzima aho uwo byasabitse aba adafite imbaraga zo gukora bityo ugasanga umuryango we uhora urangwamo umutekano  mucye ndetse n’ubukene.”

Uyu muyobozi asanga ikibazo cy’ibiyobyabwenge gikwiye kurushaho kuganirwaho mu biganiro bitangirwa mu Nteko z’abaturage, hakabaho gusobanurirwa ingaruka ibiyobyabwenge bifite kubuzima ndetse n’uruhare bigira mu bikorwa bihungabanya umutekano.

Chief Inspector of Police (CIP) Justin Kajeje ushinzwe guhuza ibikorwa bya Polisi n’abaturage hagamijwe gukumira ibyaha yashimiye abaturage ku makuru batanze polisi ikabasha gufata abakomeje kwishora mu bucuruzi bw’ibiyobyabwenge n’inzoga zitemewe.

CIP Kajeje akomeza asaba abaturage kurushaho kuba maso bakarwanya abakomeje kwinjiza ibiyobyabwenge n’inzoga zitemewe  mu gihugu.

Yagize ati:’’Agace dutuyemo gafatwa nk’inzira y’injiza ibiyobyabwenge cyangwa inzoga zitemewe mu gihugu bituruka mu bihugu by’abaturanyi kubirwanya bikwiye kuba ibya buri wese atanga amakuru yaho bigaragara.’’

CIP Kajeje asoza avuga ko ingamba zo kurwanya ibiyobyabwenge za kajijwe  kubufatanye n’abaturage ubicuruza wese azafatwa.

Yagize ati:’’uretse kuba bihungabanya umutekano bikanagira ingaruka kubuzima bw’ubikoresha bidindiza ubukungu bw’igihugu mugihe bifashwe bikamenwa amafaranga yashowe ntagaruka, birakwiye ko abantu bareka kwijandika mu bucuruzi bw’ibiyobyabwenge bagacuruza ibicuruzwa  bidahungabanya umutekano.’’

Umurenge wa Rusarabuye ni umwe mu mirenge 17 igize akarere ka Burera, aka gace kakaba gafatwa nk’imwe mu nzira inyuzwamo ibiyobyabwenge n’inzoga zitemewe zirimo kanyanga, chief warage, zebra warage bituruka mu bihugu by’abaturanyi ku birwanya bikaba bikwiye kuba ibya buri wese binyuze mu gutanga amakuru y’aho bigaragaye.