Kinyarwanda
English
Ubukangurambaga ku isuku n’umutekano mu karere ka Burera burakomeje; bukaba bukorwa na Polisi y’u Rwanda ifatanyije n’urubyiruko rw’abakorerabushake mu kubumbatira umutekano rwo muri aka karere.
Iki gikorwa cyatangiye ku itariki 5 z’uku kwezi. Mu miryango isaga 2700 iteganyijwe gusurwa, hagamijwe kuyishishikariza kwita ku isuku no kuyisobanurira isano ifitanye n’umutekano. Hamaze gusurwa imiryango igera ku 1200 ibarizwa mu mirenge 12; imiryango isigaye yo mu mirenge itanu ikaba izasurwa mu minsi iri imbere.
Ku itariki 18 Mutarama uyu mwaka Polisi y’u Rwanda n’uru rubyiruko basuye imiryango 83 yo mu murenge wa Rugarama igizwe n’abagera kuri 450.
Mu kiganiro yagiranye na bo, ushinzwe imikoranire ya Polisi y’u Rwanda n’abaturage ndetse n’izindi nzego muri aka karere, Assistant Inspector of Police (AIP) Phelin Nshimiyumukiza yababwiye isano iri hagati y’isuku n’umutekano; aha akaba yaragize ati,"Isuku nke itera uburwayi butandukanye; kandi uburwayi ubwabwo ni imbogamizi ikomeye ku iterambere n’amahoro birambye mu murwango kubera ko nta tuze n’umutekano umurwayi aba afite bitewe no kubabazwa n’umubiri."
Yagize kandi ati," Uburwayi butera inzara n’ubukene ku buryo hari bamwe mu bagize imiryango birangwamo biba imyaka n’ibindi bintu kugira ngo babeho; be kwicwa n’inzara; ariko iyo bafashwe barabihanirwa kuko baba bakoze icyaha. Murumva aho isuku nke ishobora kuganisha umuntu."
Nk’uko yabigenje n’ahandi, AIP Nshimiyumukiza yasabye iyo miryango 83 yo mu murenge wa Rugarama kurangwa n’isuku ku mubiri, aho bakorera imirimo itandukanye, aho bagenda, ndetse n’isuku y’ibinyobwa n’ibiribwa, kandi bakabitoza abandi baturanye.
Yabakanguriye kandi kwirinda ibiyobyabwenge by’ubwoko bwose, amakimbirane n’ihohoterwa; ririmo irikorerwa abana, irishingiye ku gitsina, ndetse n’iribera mu ngo.
AIP Nshimiyumukiza yasoje ikiganiro yagiranye na yo ayisaba kwirinda ikintu cyose kinyuranije n’amategeko no gutanga amakuru atuma gikumirwa.
Umuhuzabikorwa w’uru rubyiruko rw’abakorerabushake mu karere ka Burera, Ngemba Gervain yagiriye abagize iyo miryango inama yo kwirinda kuraza amatungo mu nzu babamo kuko bishobora kubakururira uburwayi butandukanye, kugira ubwiherero; kandi bakita ku isuku yabwo harimo kubupfundikira, gucukura ingarani yo gushyiramo ibishingwe n’imyanda; kandi abasaba kubaka agatanda ko gushyiraho ibikoresho by’isuku bamaze koza.
Ngemba yabakanguriye kandi kwitabira umugoroba w’ababyeyi, guteka amazi yo kunywa, kugira imigozi yo kwanikaho imyenda, no kwita ku isuku yo mu kanwa boza neza amenyo bakoresheje imiti yabugenewe.
